សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា “អាដហុក” មានកិត្តិយសសូមជូនដំណឹងដល់សាធារណៈជន អង្គការសង្គមស៊ីវិលជាតិ អន្តរជាតិ ស្ថានទូតអន្តរជាតិ អ្នកសារព័ត៌មានជាតិ និងអន្តរជាតិទាំងអស់ជ្រាបថា នៅវេលាម៉ោង ៨:០០ ព្រឹកថ្ងៃទី ៤ ខែវិច្ឆិកា ឆ្នាំ២០២២ ខាងមុខនេះ តុលាការកំពូលនឹងបើកសវនាការលើសំណុំរឿងបណ្តឹងសារទុករបស់មន្ត្រីជាន់ខ្ពស់សមាគមអាដហុកចំនួន ០៣ (បី) រូប រួមមានលោក នី សុខា លោក យី សុខសាន្ត និងលោកស្រី លឹម មុន្នី និងអតីតមន្ត្រីអាដហុកចំនួន ០២ (ពីរ) រូបទៀតគឺលោក ណៃ វ៉ង់ដា និងលោក នី ចរិយា ដែលកន្លងមកត្រូវបានសាលាដំបូងដាក់ពន្ធនាគារ ម្នាក់ៗកំណត់០៥ឆ្នាំ ដោយត្រូវអនុវត្តទោសក្នុងពន្ធនាគាររយៈពេល១៤ (ដប់បួន) ខែ និងសល់ប៉ុន្មានព្យួរ ពីបទ “សូកប៉ាន់សាក្សី” ត្រូវបានចាប់ខ្លួនដោយអង្គភាពប្រឆាំងអំពើពុករលួយកាលពីថ្ងៃទី ២៧ ខែមេសា ឆ្នាំ២០១៦ តាមមាត្រា ៥៤៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ហើយត្រូវបានបញ្ជូនទៅឃុំខ្លួននៅពន្ធនាគារនៅថ្ងៃទី ០១ ខែឧសភា ឆ្នាំ២០១៦ រហូតដល់ថ្ងៃទី ២៩ ខែមិថុនា ឆ្នាំ២០១៧ ហើយត្រូវបានអ្នកទាំង ៥ រូប ប្តឹងទៅសាលាឧទ្ធរណ៍ កាលពីចុងឆ្នាំ២០១៨ ដើម្បីរកយុត្តិធម៌ និងផ្តល់នូវកិត្តិយសដល់ពួកគាត់វិញ ។ បន្ទាប់មក នៅរសៀលថ្ងៃទី២៨ ខែមេសា ឆ្នាំ២០២២ សាលាឧទ្ធរណ៍ភ្នំពេញ ក៏បានបើកសវនាការជំនុំជំរះលើបណ្តឹងឧទ្ធរណ៍របស់អ្នកទាំងប្រាំខាងលើ ដោយលោកចៅក្រមប្រឹក្សាសម្រេចប្រកាសសាលដីកានៅវេលាម៉ោង៨ព្រឹកថ្ងៃទី២៣ ខែឧសភា ដោយតម្កល់ទុកជាបានការទាំងស្រុងនៅសាលក្រមសាលាដំបូង ។ បន្ទាប់ពីប្រកាសសាលដីកានេះ មន្ត្រីជាន់ខ្ពស់សមាគមអាដហុក ៣រូប បានប្តឹងសារទុកទៅតុលាការកំពូល ដើម្បីទាមទាររកយុត្តិធម៌ និងភាពត្រឹមត្រូវជូនពួកគាត់វិញ ទើបព្រឹកម៉ោង៨ថ្ងៃទី៤ ខែវិច្ឆិកា ឆ្នាំ២០២២ តុលាការនឹងបើកសវនាការតាមការប្តឹងសារទុកលើករណីនេះ ។
ដូច្នេះ យើងខ្ញុំសូមគោរពអញ្ជើញសាធារណៈជន អង្គការសង្គមស៊ីវិលជាតិ អន្តរជាតិ តំណាងស្ថានទូត អ្នកសារព័ត៌មានជាតិ និងអន្តរជាតិទាំងអស់ ចូលរួមតាមដាន និងឃ្លាំមើលកុំបីខាន ៕
សូមអរគុណ!
សម្រាប់ព័ត៌មានបន្ថែមសូមទំនាក់ទំនង៖
លោក ស៊ឹង សែនករុណា :០៨៦ ៣២៤ ៦៦៦
លោក ភិន សាវៃ : ០៦៨ ៨៣១ ៦៦៦
