វេទិការសាធារណៈស្តីអំពី “ហិង្សាភេទ អំពើជួញដូរមនុស្ស និងសុវត្ថិភាពចំណាកស្រុក” ខេត្តព្រះវិហារ

សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា(អាដហុក) ក្រោមការគាំទ្រថវិកាដោយ MISEREOR បានរៀបចំវេទិការសាធារណៈស្តីអំពី “ហិង្សាភេទ អំពើជួញដូរមនុស្ស និងសុវត្ថិភាពចំណាកស្រុក” នាព្រឹកថ្ងៃទី១៩ ខែកញ្ញា ឆ្នាំ២០២៤ ស្ថិតនៅភូមិម្លូព្រៃ ឃុំម្លូព្រៃមួយ ស្រុកឆែប ខេត្តព្រះវិហារ។ សមាសភាពចូលរួមមកពី ៤ឃុំ (៨ភូមិ) រួមមាន៖ ភូមិជោគជ័យ ភូមិសំបូរ ភូមិការឡោត ឃុំសង្កែពីរ ភូមិក្តុល ភូមិម្លូព្រៃ ភូមិពោនិទាប ឃុំម្លូព្រៃមួយ ភូមិបុស្ស ឃុំម្លូព្រៃពីរ និងភូមិសង្កែ ឃុំសង្កែមួយ ស្រុកឆែប ខេត្តព្រះវិហារ។ អ្នកចូលរួមសរុប ៨៧នាក់ ជាប្រជាសហគមន៍ ក្នុងនោះមានស្រ្តី ៥៥នាក់ ដែលមានវាគ្មិនសរុប ៣រូប ៖ ១. លោកស្រី ទិន ហាយ តួនាទីជាមេឃុំម្លូព្រៃមួយ ២. លោកអនុសេនីយ៍ឯក សាត ប៊ុនធា តួនាទីជាមេប៉ុសិ៍្តឃុំម្លូព្រៃមួយ និង៣. លោកស្រី ស៊ុន ម៉ាលី តួនាទីជាប្រធានផ្នែកសិទ្ធិស្រ្តី និងកុមារនៃសមាគមអាដហុក និងតំណាងខេត្តសម៉ី ២រូប គឺអ្នកស្រី ហ៊ូ ម៉ាបូន្នី និងកញ្ញា ខាំ ដៀប វេទិការសាធារណៈនេះធ្វើឡើងក្នុងគោលបំណង៖

១. ដើម្បីផ្តល់ចំណេះដឹងដល់ ប្រជាពលរដ្ឋ សហគមន៍ ឱ្យបានយល់ពី សិទ្ធិស្ត្រី អំពើហិង្សាក្នុងគ្រួសារ និងការលែងលះ សមភាពយេនឌ័រ ការជួញដូរមនុស្ស កេងប្រវ័ញ្ចកម្លាំងពលកម្ម និងធ្វើទេសន្តរប្រវេសន៍ឱ្យមានសុវតិ្ថភាព។

២. ដើម្បីជំរុញ និងលើកទឹកចិត្តឱ្យ ប្រជាពលរដ្ឋ សហគមន៍ សិក្សាស្វែងយល់អំពីផលប៉ះពាល់នៃអំពើហិង្សាក្នុងគ្រួសារ សមភាពយេនឌ័រ ល្បិចមេខ្យល់ ការជួញដូរមនុស្ស និងការធ្វើទេសន្តរប្រវេសន៍ដោយសុវត្ថិភាព។

៣. ជំរុញការយល់ដឹង ក្នុងការស្វែងរកសេវាកម្ម អាដហុក ដើម្បីអាចជួយខ្លួន គ្រួសារ និង សហគមន៍ ព្រមទាំងធ្វើការផ្សព្វផ្សាយចំណេះដឹងបន្តទៅ បងប្អូន មិត្តភក្តិ នៅក្នុងសហគមន៍របស់ខ្លួន។