កាលពីវេលាម៉ោង១:៣០នាទី ថ្ងៃទី១៥ ខែសីហា ឆ្នាំ២០២៣ ពលរដ្ឋមានជម្លោះដីធ្លីជាមួយ ឧកញ៉ា ហេង ហ៊ុយ និង ក្រុមហ៊ុនស្ករអំពៅ លី យ៉ុងផាត់ បានមកប្រមូលផ្តុំនៅមុខតុលាការខេត្តកោះកុង ប្រមាណជាង ១០០នាក់ ដែលមកពីសហគមន៍ចំនួនបី ៨៤៣, ១៩៥ និងសហគមន៍៩៥៥ ស្ថិតក្នុងឃុំ ដងពែង និងឃុំជីខលើ ស្រុកស្រែអំបិល និងឃុំកណ្ដោល ស្រុកបូទុមសាគរ ខេត្តកោះកុង ក្នុងបំណងទាមទារបីចំណុចធំៗដូចខាងក្រោម :
១.ទាមទារឲ្យទម្លាក់ការចោទ មកលើប្រជាសហគមន៍ ចំនួន ៧នាក់ រួមមាន ១. ឃុង រ៉ុច, ២. នុយ សុ, ៣.ទូច ង៉ាន់, ៤.ទន់ ឡាយ, ៥. ភាព តេង, ៦. ឆោម រើន និង៧. ឡុង មឿន មកពីសហគន៍ ៨៤៣ នៅភូមិព្រលាន ឃុំកណ្តោល ដែលតុលាការចោទពីបទ “ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងធ្វើឲ្យប៉ះពាល់ដល់ទ្រព្យសម្បត្តិឯកជនរបស់រដ្ឋ”។
២. ទាមទារឲ្យទម្លាក់ការចោទមកលើ ក្រុមសហគមន៍ ១៩៥ ចំនួន ១០នាក់ មកពីឃុំជីខលើ ក្នុងនោះមាន ឈ្នោះ ដេត ហ៊ួ ,តើត នៅ, ហេង ជៃ, សុខ ជ័យ, ពួ ហ៊ួន, អិន ធូ, អីប តឹង, គង់ ម៉ែន , ឆាន់ ឈឿន, អីប វី ដែលត្រូវចោទពីបទ “ញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម”។
៣. ទាមទារឲ្យដោះលែងប្រជាសហគមន៍ ចំនួន ៩នាក់ រួមមាន ១ . ផាវ ញ៉ឺង ស្រី, ២. ដេត ហ៊ួ ស្រី, . ៣ សុខ ជ័យ ប្រុស . ៤ ហេង ជៃយ ប្រុស, ៥. ឡាំង ជៀវ ប្រុស, ៦. យឿន ខ្មៅ ស្រី ៧. យី គន្ធា ស្រី, ៨.សេង លីន ស្រី, ៩.ទិន តាំង ស្រី ដែលត្រូវបានចោទ និងចាប់ឃុំខ្លួន ទៅពន្ធនាគារខេត្តកោះកុង កាលពីថ្ងៃ៣០ ខែមិថុនា ឆ្នាំ២០២៣ ខណ:ពេលដែលប្រជាពលរដ្ឋទាំងនោះ ធ្វើដំណើរទៅដាក់ញត្តិនៅក្រសួងយុត្តិធម៌ រាជធានីភ្នំពេញ ដើម្បីសុំកិច្ចអន្តរាគមន៍ពីរដ្ឋមន្ត្រីក្រសួងយុត្តិធម៌ ទម្លាក់ចោលការចោទប្រកាន់លើពួកគាត់ កាលពីព្រឹកថ្ងៃទី២៩ ខែមិថុនា ឆ្នាំ២០២៣។ ដោយចោទប្រកាន់ពីបទ៖ “ ញុះញង់ឲ្យប្រព្រឹត្តបទល្មើសជាអាទិ៍” ដោយពួកគាត់បញ្ជាក់ថា នឹងបន្តដេក បោះតង់ និងដាំបាយ នៅមុខសាលាដំបូងខេត្តកោះកុង រហូតដល់មានការដោះលែងអ្នកទាំង៩នាក់ ដែលកំពុងជាប់ឃុំខ្លួននៅពន្ធនាគារ ឲ្យមានសេរីភាពឡើងវិញ ។
សូមបញ្ជាក់ថា កាលពីថ្ងៃម្សិលមិញនេះ តុលាការខេត្តកោះកុង សម្រេចផ្ដន្ទាទោស ប្រជាសហគមន៍ ព្រលាន ចំនួន៧នាក់ ផ្តន្ទាទោសឲ្យជាប់ពន្ធនាគារម្នាក់ៗ ចំនួនមួយឆ្នាំ តែទោសព្យួរ និងពិន័យជាប្រាក់ចូលរដ្ឋ ម្នាក់ៗ៥លានរៀល។
មួយករណីទៀតត្រូវបានតុលាការសម្រេច ផ្ដន្ទាទោសប្រជាសហគមន៍ ១៩៥ ចំនួន ១០នាក់ ដោយឲ្យជាប់ពន្ធនាគារ ក្នុងម្នាក់ៗមួយឆ្នាំ និងពិន័យប្រាក់ជារួមចំនួន ៤០លានរៀល ឲ្យទៅលោកឧញ៉ា ហេង ហ៊ុយ ប៉ុន្តែម្នាក់ក្នុងចំណោម អ្នកទាំង១០នាក់ ឈ្មោះ អីប វី ត្រូវបានលើកលែងចោទ ។ ក្នុងករណីអ្នកទាំង១០នេះដែរ ក៏មានពលរដ្ឋ៣នាក់ កំពុងជាប់ឃុំនៅពន្ធនាគារផងដែរ មានឈ្មោះ ហេង ជៃ , សុខ ជ័យ និង ដេត ហ៊ួ ។
សូមបញ្ជាក់ថា ករណីទាំងនេះ សមាគមអាដហុក កំពុងឃ្លាំមើលយ៉ាងយកចិត្តទុកដាក់លើដំណើរការដោះស្រាយ និងដាក់មេធាវីការពារក្តីជូនពួកគាត់ ស្របតាមនីតិវិធីច្បាប់ផងដែរ ៕
