ព្រឹកថ្ងៃទី២៦ ខែមិថុនា ឆ្នាំ២០២០ នេះ នៅខាងមុខសាលាដំបូងរាជធានីភ្នំពេញ គ្រួសារសកម្មជននយោបាយទាំង ១៥នាក់ បានធ្វើការទាមទារតវ៉ាសុំឲ្យតុលាការដោះលែងសកម្មជននយោបាយទាំង១៥នាក់ ដែលកំពុងជាប់ឃុំនៅពន្ធនាគារព្រៃស ដោយមានអាជ្ញាធរស៊ីវិល សន្តិសុខ និងសមត្ថកិច្ចនគរបាលចំរុះ ប្រមាណជាង ៣០នាក់ កំពុងឃ្លាំមើល និងចាប់យកបដា ដោយហាមឃាត់មិនឲ្យពួកគាត់លើកបដាទាមទារនោះទេ ។ ពួកគាត់ក៏បានទៅដាក់ញត្តិ ជូនឯកអគ្គរដ្ឋទូតសហរដ្ឋអាមេរិក ប្រចាំកម្ពុជា ដើម្បីស្នើសុំឲ្យជួយអន្តរាគមន៍ដោះលែងសកម្មជននយោបាយទាំង ១៥នាក់ នៅខាងមុខស្ថានទូតសហរដ្ឋអាមេរិក ដោយខាងស្ថានទូតអនុញាតឲ្យអ្នកដាក់ញត្តិ ២នាក់ យកញត្តិទៅជូនតំណាងស្ថានទូតសហរដ្ឋអាមេរិក ២រូប ដែលចេញមកទទួលញត្តិ នៅខាងមុខក្លោងទ្វារចូលស្ថានទូតសហរដ្ឋអាមេរិកផងដែរ ។ គួរបញ្ជាក់ថា សកម្មជននយោបាយអតីតគណបក្សសង្គ្រោះជាតិ ដែលត្រូវតុលាការកំពូលរំលាយ កាលពីឆ្នាំ២០១៧ ត្រូវបានសមត្ថកិច្ចចាប់ឃុំខ្លួនជាបន្តបន្ទាប់ ក្នងកំឡុងពេលដើមឆ្នាំ២០២០ នេះ ដោយចោទប្រកាន់ពីបទ ញុះញុងឲ្យប្រព្រឹត្តបទឧក្រិដ្ឋជាអាទិ៍ រួមគំនិតក្បត់ និងញុះញង់មិនឲ្យយោធាស្តាប់បង្គាប់ ។ ការទាមទារនេះ បានធ្វើម្តងរួចមកហើយ កាលពីព្រឹកថ្ងៃទី១៩ ខែមិថុនា ឆ្នាំ២០២០ នៅសាលាដំបូងរាជធានីភ្នំពេញ និងបន្តទៅដាក់ញត្តិនៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដើម្បីសុំឲ្យជួយអន្តរាគមន៍ដោះលែងអ្នកទាំង ១៤នាក់ នៅព្រឹកថ្ងៃទី១៩ ដដែលនោះផងដែរ ។ ពួកគាត់បានបញ្ជាក់ថា ពួកគាត់ដែលជាក្រុមគ្រួសារអ្នកជាប់ឃុំនៅពន្ធនាគារទាំង ១៥នាក់ និងបន្តធ្វើការទាមទារឲ្យមានការដោះលែងអ្នកទាំង ១៥នាក់ រៀងរាល់ព្រឹកថ្ងៃសុក្រ រហូតដល់មានការដោះលែងអ្នកទាំង ១៥នាក់ មានសេរីភាពជួបជុំគ្រួសារវិញ ទើបព្រមបញ្ឈប់ការទាមទារតវ៉ា ៕
អត្ថបទ និងរូបភាព៖ ស៊ឹង សែនករុណា
