សេចក្តីថ្លែងការណ៍រួម
ការលើកកម្ពស់សិទ្ធិរបស់ស្ត្រីនៅកន្លែងការងារពិតជាមានសារៈសំខាន់បំផុត
រាជធានីភ្នំពេញ ថ្ងៃទី១១ ខែមីនា ឆ្នាំ២០២១
យើងខ្ញុំជាអង្គការសង្គមស៊ីវិលដែលមានរាយនាមខាងក្រោម មានការខកចិត្តជាខ្លាំងនៅពេលដែលបានអានសេចក្តីរាយការណ៍ទាក់ទងនឹងមន្ត្រីនគរបាលជាស្ត្រីម្នាក់ បានប្រឈមនឹងវិធានការវិន័យដោយសារការបង្ហោះរូបភាពនៃការបំបៅដោះកូនក្នុងសំលៀកបំពាក់ឯកសណ្ឋាននគរបាលនៅលើទំព័រគណនីហ្វេសប៊ុកផ្ទាល់ខ្លួនរបស់គាត់។ រឿងដែលធ្វើឱ្យកាន់តែខកចិត្តទៅទៀតនោះគឺករណីនេះបានកើតឡើងតែមួយថ្ងៃប៉ុណ្ណោះបន្ទាប់ពីទិវានារីអន្តរជាតិ ដែលនេះបង្ហាញឱ្យឃើញថែមទៀតថា សិទ្ធិស្រ្តីនៅតែជាបញ្ហាប្រឈមនៅប្រទេសកម្ពុជា។
ស្ត្រីមិនគួរត្រូវបានបង្ខំឱ្យជ្រើសរើសរវាងការងារ និងការមើលថែទាំកូននោះទេ។ ប្រការដែលស្ត្រីជាម្តាយហើយដែលទៅធ្វើការនឹងត្រូវស្តីបន្ទោស បើស្រ្តីនោះធ្វើទាំងការងារនិងភារកិច្ចមើលថែទាំកូន ដូចជាករណីនេះជាឧទាហរណ៍ស្រាប់ ដែលនេះបង្ហាញឲ្យឃើញថារដ្ឋាភិបាលខកខានក្នុងការការពារសិទ្ធិស្ត្រីនៅកន្លែងធ្វើការ ទោះបីជាប្រទេសកម្ពុជាបានផ្តល់សច្ចាប័នទៅលើអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងស្ត្រីភេទ (ស៊ី ដ) ដែលការពារសិទ្ធិធ្វើការងារដោយមិនមានការរើសអើង។
នៅកម្ពុជា ថ្វីបើកម្លាំងពលកម្មស្ត្រីមានចំនួនប្រហាក់ប្រហែលនឹងបុរសក្តី ក៏ចំនួនស្ត្រីនៅក្នុងតំណែងជាអ្នកដឹកនាំនៅមានកម្រិតនៅឡើយ។ ផ្នត់គំនិតមិនជឿនលឿន បវេណី និងវប្បធម៌ដែលបានចាក់ឫសកប់យ៉ាងជ្រៅនេះ បន្តកើតមានដែលជាតថភាពមួយនៅតែជាក្តីបារម្ភ។ ម្យ៉ាងទៀត ប្រការដែលស្ថាប័នការងារជាច្រើនពុំបានផ្តល់ហេដ្ឋារចនាសម្ព័ន្ធ ឬបរិក្ខារមើលថែទាំទារកគ្រប់គ្រាន់សម្រាប់បុគ្គលិក ឬកម្មករនិយោជិតជាម្តាយ ឬឆ្លើយតបនឹងតម្រូវការចាំបាច់ដល់ពួកគាត់ គឺជាឧបសគ្គដ៏ធំមួយក្នុងចំណោមឧបសគ្គជាច្រើនទៀត ដែលរារាំងស្ត្រីក្នុងការឡើងទៅកាន់តំណែងជាថ្នាក់ដឹកនាំ។ ដើម្បីឱ្យស្ត្រីទទួលបានសិទ្ធិនៅកន្លែងធ្វើការ ជាការសំខាន់បំផុតគឺត្រូវផ្តល់ហេដ្ឋារចនាសម្ព័ន្ធនិងបរិក្ខារមើលថែទារក ទារកដ្ឋាននិងពេលវេលាសម្រាកក្នុងការបំបៅកូនដោយទទួលបានប្រាក់ឈ្នួលដល់បុគ្គលិក ឬកម្មករនិយោជិត ព្រមទាំងបង្កភាពងាយស្រួលដល់ពួកគេក្នុងការបន្តអាជីពការងាររបស់ខ្លួន។
នោះគឺជារឿងគួរឱ្យអាម៉ាសចំពោះការតម្រូវឱ្យមន្ត្រីនគរបាលនោះត្រូវសុំទោស ក្រោមហេតុផលថាបានធ្វើឱ្យប៉ះពាល់ដល់កិត្តិយសរបស់អង្គភាពនិងស្ត្រីខ្មែរ ហើយតម្រូវឲ្យនាងចុះកិច្ចសន្យាមិនបន្តអកប្បកិរិយាបែបនេះទៅទៀត។ ក្រោយមក បន្ទាប់ពីការមានការរិះគន់ពីសាធារណៈជន មន្ត្រីនគរបាលជាថ្នាក់ដឹកនាំនោះបានចេញមុខបកស្រាយថា ដោយយោងលើហេតុផលថាអ្នកស្រីនគរបាលរូបនោះ ពុំបានសុំការអនុញ្ញាតជាមុនក្នុងការបង្ហោះរូបភាពនៃការបំបៅដោះកូននៅលើទំព័រហ្វេសប៊ុក ដែលការពន្យល់នេះបង្កើនការព្រួយបារម្ភថែមទៀតអំពីសេរីភាពក្នុងការបញ្ចេញមតិ។ សិទ្ធិសេរីភាពក្នុងការសម្តែងអំពីអារម្មណ៍ផ្ទាល់ខ្លួនគឺជាសិទ្ធិដែលមានការទទួលស្គាល់ជាអន្តរជាតិដែលមានចែងនៅក្នុងរដ្ឋធម្មនុញ្ញរបស់កម្ពុជា ពុំមែនជាបុព្វសិទ្ធិពិសេស ហើយក៏ពុំមែនការប្រទានដោយការអនុគ្រោះនោះដែរ សិទ្ធិនេះត្រូវបានរឹតត្បិតតែក្នុងលក្ខខណ្ឌចំាបាច់បំផុតតែប៉ុណ្ណោះ ហើយគ្មានលក្ខខណ្ឌណាមួយក្នុងចំណោមលក្ខខណ្ឌទាំងនេះឆ្លើយតបករណីនេះនោះទេ។
ចំពោះករណីខាងលើនេះ យើងខ្ញុំស្នើដល់មន្ត្រីនគរបាលជាថ្នាក់ដឹកនាំស្ត្រីនគរបាលរូបនោះ គប្បីចេញមុខសុំអភ័យទោសជាសាធារណៈចំពោះឥរិយាបថឆ្គាំឆ្គងក្នុងការដោះស្រាយករណីនេះ និងចំពោះការធ្វើឱ្យប៉ះពាល់កិត្តិយសនិងសេចក្តីថ្លៃថ្នូរបស់មន្ត្រីក្រោមឱវាទរបស់ខ្លួន។ ម្យ៉ាងវិញទៀត អគ្គស្នងការនគរបាលជាតិគួរមានវិធានការឱ្យកែតម្រូវដើម្បីធានាថាករណីនេះនឹងពុំកើតឡើងសារជាថ្មី និងដើម្បីធានាឱ្យមានសមភាពយេនឌ័រនៅកន្លែងការងារផងដែរ។
យើងខ្ញុំសូមស្នើឲ្យរាជរដ្ឋាភិបាលកម្ពុជាមានវិធានការដូចខាងក្រោម ៖
- ចាត់វិធានការសមស្របដើម្បីធានាថាឪពុកម្តាយគ្រប់រូប ដែលបំពេញការងារទទួលបានការគាំទ្រនៅក្នុងកន្លែងការងារ ហើយស្ថាប័នការងារត្រូវផ្តល់បរិក្ខារ និងទីកន្លែងមើលថែទាំទារកដែលជាតម្រូវការចាំបាច់ខ្លាំងសម្រាប់បុគ្គលិកឬកម្មករនិយោជិតជាម្តាយ
- ចាត់វិធានការដើម្បីធានាថាសិទ្ធិរបស់ស្ត្រីនៅកន្លែងការងារត្រូវបានគោរពនិងលើកកម្ពស់
- អនុវត្តអនុសាសន៍ដែលប្រទេសកម្ពុជាបានទទួលយកតាមរយៈយន្តការនៃការពិនិត្យជាសកលតាមកាលកំណត់ (យូភីអ) ក្នុងឆ្នាំ២០១៩ ក្នុងនោះមានដូចជាបង្កើនកិច្ចប្រឹងប្រែងឱ្យបានខ្លាំងក្នុងការលុបបំបាត់ការរើសអើងលើស្ត្រីភេទជាដើម
- អនុម័តកិច្ចគាំពារពាក់ព័ន្ធនឹងអំឡុងពេលមាតុភាព ដែលអនុលោមតាមបញ្ញត្តិក្នុងអនុសញ្ញានៃអង្គការពលកម្មអន្តរជាតិលេខ ១៨៣ និង
- បញ្ឈប់ការរឹតត្បិតលើសេរីភាពក្នុងការបញ្ចេញមតិ៕
សេចក្តីថ្លែងការណ៍រួមនេះគាំទ្រដោយ ៖
| 1 | សកម្មភាពដើម្បីអភិវឌ្ឍន៍ |
| 2 | អង្គការអាក់សិនអេតកម្ពុជា |
| 3 | វិទ្យាស្ថានតស៊ូមតិ និង គោលនយោបាយ |
| 4 | អង្គការក្រុមការងារដើម្បីដោះស្រាយទំនាស់ |
| 5 | សមាគមអ្នកបម្រើការងារតាមផ្ទះ |
| 6 | សមាគមគាំពារស្ត្រីងាយរងគ្រោះ |
| 7 | សហព័ន្ធសហជីពកម្មករចំណីអាហារនិងសេវាកម្មកម្ពុជា |
| 8 | សហភាពការងារកម្ពុជា |
| 9 | សហព័ន្ធសហជីពកម្មករនិយោជិតវិស័យទេសចរណ៍កម្ពុជា |
| 10 | សមាគមមន្រ្តីរាជការឯករាជ្យកម្ពុជា |
| 11 | មជ្ឈមណ្ឌលសិទ្ធិមនុស្សកម្ពុជា |
| 12 | មជ្ឈមណ្ឌលកម្ពុជាដើម្បីប្រព័ន្ធផ្សពផ្សាយឯករាជ្យ |
| 13 | អង្គការជនពិការកម្ពុជា |
| 14 | អង្គការកម្ពុជាដើម្បីសុខភាពនិងការអប់រំសហគមន៍ |
| 15 | សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា |
| 16 | អង្គការសម្ព័ន្ធខ្មែរជំរឿន និងការពារសិទ្ធិនុស្ស លីកាដូ |
| 17 | អង្គការកម្ពុជាដើម្បីជួយស្ត្រីមានវិបត្តិ |
| 18 | បណ្តាញយុវជនកម្ពុជា |
| 19 | មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស |
| 20 | សហគមន៏ ជីខក្រោមក្រុម១៧៥គ្រសារ |
| 21 | សមាគមសម្ព័ន្ធសហគមន៍កសិករកម្ពុជា |
| 22 | មជ្ឈមណ្ឌលអប់ច្បាប់សម្រាប់សហគមន៍ |
| 23 | ជំំនួយរបស់វិហារដាណឺម៉ាក |
| 24 | អង្គការសមធម៌កម្ពុជា |
| 25 | អង្គការយេនឌ័រ និងអភិវឌ្ឍន៍ដើម្បីកម្ពុជា |
| 26 | បណ្តាញយេនឌ័រនិងអភិវឌ្ឍន៍កម្ពុជា |
| 27 | សមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ |
| 28 | អង្គការក្លាហាន |
| 29 | ជំនួយផ្លូវច្បាប់ដល់ កុមារ និងស្រ្តី |
| 30 | អង្គការម្លប់បៃតង |
| 31 | គណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវ |
| 32 | សមាគមថែទាំសុខភាពគ្រួសារកម្ពុជា |
| 33 | អង្គការសមាគមធាងធ្នោត |
| 34 | អង្គការសីលការ |
| 35 | គណៈកម្មាធិការនៃអង្គការមិនមែនរដ្ឋាភិបាលកម្ពុជា ដើម្បីអនុសញ្ញា លុបបំបាត់រាល់ទម្រង់នៃការរើសអើងលើស្រ្តី |
| 36 | អង្គការសម្ព័នដើម្បីសុចរិតភាព និងគណនេយ្យភាពសង្គម |
| 37 | អង្គការតម្លាភាពកម្ពុជា |
| 38 | អង្គការនារីដើម្បីសន្តិភាព |
| 39 | អង្គការកម្មវិធីអភិវឌ្ឍធនធានយុវជន |
