រាជធានីភ្នំពេញ ថ្ងៃទី២៥ ខែវិច្ឆិកា ឆ្នាំ២០២៤
យើងខ្ញុំជាក្រុមអង្គការសង្គមស៊ីវិលដែលរួមមាន សមាគម សហជីព និងអង្គការមិនមែនរដ្ឋាភិបាល ដែលកំពុងធ្វើការងារដើម្បីលើកកម្ពស់សិទ្ធិការងារ សិទ្ធិស្ត្រី និងសមភាពយេនឌ័រនៅប្រទេសកម្ពុជា នឹងធ្វើការរៀបចំប្រារព្ធយុទ្ធនាការ ១៦ថ្ងៃ នៃភាពសកម្មនិយមប្រឆាំងអំពើហិង្សាផ្អែកលើយេនឌ័រ (ហៅកាត់ថា «យុទ្ធនាការ ១៦ថ្ងៃ») ក្រោមប្រធានបទ ៖ «លើកកម្ពស់សិទ្ធិអំណាចស្ត្រី និងក្មេងស្រី ដើម្បីរួចផុតពីការបៀតបៀតគ្រប់ទម្រង់ »។
យុទ្ធនាការនេះ មានគោលបំណងលើកកម្ពស់ការយល់ដឹងអំពីយុទ្ធនាការ១៦ថ្ងៃ ផ្ដល់ឱកាសដល់សកម្មជន ឬអ្នកការពារសិទ្ធិមនុស្សជាស្ដ្រី ទាំងក្នុងវិស័យយេនឌ័រ និងវិស័យផ្សេងៗ លើកឡើងនូវបញ្ហាប្រឈមដែលពួកគេបានជួបប្រទះកន្លងមក ព្រមទាំងធ្វើការជួបជុំដើម្បីថ្លែងសារអំពីសំណូមពររបស់ពួកគេ ។ នៅឱកាសនោះដែរ សកម្មជន ឬអ្នកការពារសិទិ្ធមនុស្ស និងសិទិ្ធស្ដ្រី នឹងស្នើសុំ ក៏ដូចជាជំរុញឱ្យរាជរដ្ឋាភិបាល គោរព និងការពារសិទ្ធិមនុស្សឱ្យបានម៉ឺងម៉ាត់ ជាពិសេសចំពោះអ្នកការពារសិទ្ធិមនុស្សជាស្ដ្រី និងដោះស្រាយបញ្ហាប្រឈមរបស់ស្ដ្រី និងក្មេងស្រីឱ្យមានប្រសិទ្ធភាព។
អាស្រ័យហេតុនេះ សូមសាធារណជនជ្រាបជាព័ត៌មាន និងអញ្ជើញចូលរួមជាមួយយើងខ្ញុំក្នុងការប្រារព្ធទិវានេះ តាមរយៈប្រព័ន្ធអនឡាញ និងដោយផ្ទាល់ ទៅតាមកាលវិភាគនៃសកម្មភាពដូចខាងក្រោម៖
- ថ្ងៃទី២៥ ខែវិច្ឆិកា ឆ្នាំ២០២៤ យើងខ្ញុំចេញសេចក្តីប្រកាសព័ត៌មានស្តីពីការយុទ្ធនាការ ១៦ ថ្ងៃ នៃភាពសកម្មនិយមប្រឆាំងអំពើហិង្សាផ្អែកលើយេនឌ័រឆ្នាំ២០២៤ ។
- នៅចន្លោះពីថ្ងៃទី២៥ ខែវិច្ឆិកា ឆ្នាំ២០២៤ ដល់ថ្ងៃទី១០ ខែធ្នូ ឆ្នាំ២០២៤ យើងខ្ញុំនឹងរៀបចំកម្មវិធីវិទ្យុ និងផ្សាយបន្តផ្ទាល់នៅលើទំព័រហ្វេសប៊ុករបស់ស្ថាប័នដៃគូរៀបចំ លើប្រធានបទផ្សេងៗគ្នា ។
- ចាប់ពីថ្ងៃទី២៥ ខែវិច្ឆិកា ឆ្នាំ២០២៤ ដល់ថ្ងៃទី១០ ខែធ្នូ ឆ្នាំ២០២៤ យើងខ្ញុំនឹងចេញផ្សាយកម្រង វីដេអូខ្លីៗ ជាបន្តបន្ទាប់ស្តីអំពីតម្រូវការទាំង១៦ របស់ស្ដ្រី និងក្មេងស្រី ។
- នៅថ្ងៃទី២៥ ខែវិច្ឆិកា ឆ្នាំ២០២៤ យើងខ្ញុំនឹងបង្ហោះស៊ុមរូបថតយុទ្ធនាការនៅលើទំព័រហេ្វសប៊ុក ដើម្បីឱ្យសាធារណជនក្នុងបណ្តាញសង្គម អាចទាញយកទៅប្រើប្រាស់នៅលើគណនីហ្វេសប៊ុករបស់ពួកគេ ។
- ចាប់ពីថ្ងៃទី២៥ ខែវិច្ឆិកា ឆ្នាំ២០២៤ ដល់ថ្ងៃទី២៩ ខែវិច្ឆិកា ឆ្នាំ២០២៤ យើងខ្ញុំនឹងចេញផុស្ទ័ររាប់ថយក្រោយដើម្បីបង្ហាញពីថ្ងៃប្រារព្ធពិធីជួបជុំ នៅទីលានប្រជាធិបតេយ្យ រាជធានីភ្នំពេញ ។
- ចាប់ពីថ្ងៃទី២៥ ខែវិច្ឆិកា ឆ្នាំ២០២៤ ដល់ថ្ងៃទី២៩ ខែវិច្ឆកា ឆ្នាំ២០២៤ យើងខ្ញុំនឹងរៀបចំកម្មវិធីសំណួរ ចម្លើយនៅលើប្រព័ន្ធអនឡាញ ដោយផ្ដោតសំខាន់លើប្រធានបទទាក់ទងនឹងយុទ្ធនាការ១៦ថ្ងៃ ។
- នៅថ្ងៃទី២៧ ខែវិច្ឆិកា ឆ្នាំ២០២៤ យើងខ្ញុំនឹងចេញផ្សាយផ្ទាំងរូបភាព អញ្ជើញសាធារណជនឱ្យចូលរួម ជួបជុំផ្ទាល់នៅទីលានប្រជាធិបតេយ្យ នៅថ្ងៃទី០១ ខែធ្នូ ។
- នៅព្រឹកថ្ងៃទី០១ ខែធ្នូ ឆ្នាំ២០២៤ យើងខ្ញុំនឹងរៀបចំកម្មវិធីជួបជុំផ្ទាល់ដែលមានអ្នកចូលរួមប្រមាណ ៥០០នាក់ ក្រោមប្រធានបទ «លើកកម្ពស់សិទ្ធិអំណាចស្ត្រី និងក្មេងស្រី ដើម្បីរួចផុតពីការបៀតបៀតគ្រប់ទម្រង់»
- ចាប់ពីថ្ងៃទី២៥ ខែវិច្ឆិកា ដល់ថ្ងៃទី៩ ខែធ្នូ ឆ្នាំ២០២៤ យើងខ្ញុំនឹងបន្តចេញផ្សាយវីដេអូខ្លីជាបន្តបន្ទាប់ ដែលមានលើកឡើងអំពីតម្រូវការផ្សេងៗទៀតរបស់ស្ដ្រី និងក្មេងស្រី ៕
ព័ត៌មានបន្ថែម សូមទាក់ទង៖
១. អ្នកស្រី អ៊ូ ទេពផល្លីន ទូរស័ព្ទ៖ ០១១ ៩៨៤ ៨៨៣
២. កញ្ញា កែវ ចាន់រ៉ា ទូរស័ព្ទ៖ ០៩៨ ៨៥២ ២៦០
៣. លោក លឹម បូរិន ទូរស័ព្ទ៖ ០១២ ៩០៤ ២៦៦
*បញ្ជីឈ្មោះអង្គការសង្គមស៊ីវិលសហការរៀបចំ៖
១. សហព័ន្ធសហជីពកម្មករនិយោជិតវិស័យទេសចរណ៍កម្ពុជា (CTWUF)
២. សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ (LRSU)
៣. សហជីពកម្មករចំណីអាហារនិងសេវាកម្ម (CFSWF)
៤. សហព័ន្ធសហជីពកម្ពុជា (CATU)
៥. សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA)
៦. មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស CENTRAL)
៧. បណ្តាញយុវជនកម្ពុជា (CYN)
៨. អង្គការសមធម៌កម្ពុជា (EC)
៩. សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC)
១០. អង្គការសមាគមធាងត្នោត (STT)
១១. មជ្ឈមណ្ឌលសិទ្ធិមនុស្សកម្ពុជា (CCHR)
១២. សម្ព័ន្ធខ្មែរជំរឿននឹងការពារសិទ្ធិមនុស្ស (LICADHO)
១៣. អង្គការក្លាហាន (Klahaan)
១៤. គណៈកម្មាធិការនៃអង្គការមិនមែនរដ្ឋាភិបាលកម្ពុជាដើម្បីអនុសញ្ញាលុបបំបាត់រាល់ទំរង់នៃការរើសអើងលើស្រ្តីភេទ (NGO-CEDAW)
១៥. សហព័ន្ធសហជីពឯករាជ្យ ( INTUFE )
១៦. គណៈកម្មាធិការដើម្បីការបោះឆ្នោតដោយសេរី និងយុត្តិធម៍នៅកម្ពុជា (COMFREL)
១៧. អង្គការអាក់សិនអេតកម្ពុជា(AAC)
១៨. សម្ព័ន្ធភាពជាដៃគូរដើម្បីការអភិវឌ្ឍតាមបែបប្រជាធិបតេយ្យ (CPDD)
១៩. សមាគមស្ត្រីជនបទដើម្បីក្សេត្របរិស្ថាន (RWAA)
