សមាគមអាដហុក គ្រប់គ្រងដោយក្រុមប្រឹក្សាភិបាល ក៏ដូចជា គណៈកម្មាធិការគ្រប់គ្រងមួយ។ តួនាទីរបស់ក្រុមប្រឹក្សាភិបាល និងគណៈកម្មាធិការគ្រប់គ្រងមានចែងនៅក្នុង រចនាសម្ព័ន្ធគ្រប់គ្រងរបស់សមាគមអាដហុក។
- ក្រុមប្រឹក្សាភិបាល
សមាគមអាដហុក គឺគ្រប់គ្រងដោយក្រុមប្រឹក្សាភិបាល ហៅថា គណៈអភិបាល ដែលមានតួនាទី និងភារកិច្ចដូចមានចែងនៅក្នុងលក្ខន្ដិកៈអង្គការ។ ក្រុមប្រឹក្សាភិបាលនេះមានសមាសភាពសមាជិកសរុបទាំងអស់ចំនួន ៥ រូប ដែលសមាជិកក្នុងចំណោមនោះត្រូវបានតែងតាំងជា ប្រធានក្រុមប្រឹក្សាភិបាល អនុប្រធានក្រុមប្រឹក្សាភិបាល ឬហេរញ្ញិក និងសមាជិកផ្សេងទៀតនៃក្រុមប្រឹក្សាភិបាល។ ក្រុមប្រឹក្សាភិបាល គឺជាស្ថាប័នដែលមានសិទិ្ធអំណាចក្នុងការធ្វើសេចក្តីសម្រេចខ្ពស់បំផុតរបស់សមាគមអាដហុក។ ក្រុមប្រឹក្សាភិបាលផ្តល់ការគាំទ្រដល់គណៈកម្មាធិការគ្រប់គ្រង និងបុគ្គលិក ដើម្បីឈានទៅសម្រេចនូវគោលដៅ និងគោលបំណង ក៏ដូចជា កម្មវិធីរបស់ខ្លួន។ គណៈគ្រប់គ្រងនេះ ត្រូវជួបប្រជុំគ្នាឱ្យបានយ៉ាងតិចណាស់ចំនួនពីរដងក្នុងមួយឆ្នាំ និងត្រូវបំពេញមុខងារនានារបស់ខ្លួន រួមមាន ការតម្រង់ទិស ការជ្រើសរើសបុគ្គលិកថ្នាក់ប្រតិបត្តិ ការជ្រើសរើសសមាជិកថ្មីរបស់គណៈគ្រប់គ្រងឡើងវិញ និងធ្វើការត្រួតពិនិត្យផ្នែកហិរញ្ញវត្ថុ (សូមមើលលក្ខន្ដិកៈអង្គការសម្រាប់ព័ត៌មានលម្អិតបន្ថែមអំពីតួនាទី និងទំនួលខុសត្រូវរបស់សមាជិកក្រុមប្រឹក្សាភិបាល)។
ក្រុមប្រឹក្សាភិបាលមានសមាសភាពសរុបទាំងអស់ចំនួន ៥ រូប រួមមាន៖
-
គណៈកម្មាធិការគ្រប់គ្រង (MC)
គណៈកម្មាធិការគ្រប់គ្រង គឺជាស្ថាប័នធ្វើសេចក្ដីសម្រេចផ្ទៃក្នុងនៅក្នុងអង្គការអាដហុក ដោយមានទំនួលខុសត្រូវក្នុងការធានាថា រាល់កម្មវិធី ប្រតិបត្តិការ និងហិរញ្ញវត្ថុទាំងអស់ដំណើរការទៅប្រកបដោយប្រសិទ្ធភាព និងប្រសិទ្ធផលខ្ពស់។ គណៈកម្មាធិការគ្រប់គ្រង ក៏មានទំនួលខុសត្រូវបំពេញកិច្ចការផ្សេងៗទៀត ដូចជា ការសម្របសម្រួលសកម្មភាព ការធ្វើសេចក្ដីសម្រេចចិត្តអំពីការជ្រើសរើសបុគ្គលិក ទំនាក់ទំនងជាមួយនឹងភាគីពាក់ព័ន្ធទាំងអស់របស់សមាគមអាដហុក និងការកៀរគរមូលនិធិ។ ទីប្រឹក្សា និងអ្នកជំនាញបច្ចេកទេសផ្សេងៗទៀត អាចនឹងត្រូវអញ្ជើញឱ្យចូលរួមនៅក្នុងកិច្ចប្រជុំគណៈកម្មាធិការគ្រប់គ្រង ប៉ុន្តែពុំមានសិទ្ធិបោះឆ្នោតឡើយ។
បន្ថែមពីលើការងារគ្រប់គ្រងកិច្ចការយុទ្ធសាស្រ្ត និងប្រតិបត្តិការរបស់ផ្នែករៀងៗខ្លួន សមាជិក គណៈកម្មាធិការគ្រប់គ្រង ក៏ត្រូវធ្វើការងាររួមគ្នា ដើម្បីផ្ដល់នូវភាពជាអ្នកដឹកនាំរួមនៅក្នុងគ្រប់ផ្នែកទាំងអស់ផងដែរ។ រចនាសម្ព័ន្ធគ្រប់គ្រងរបស់គណៈកម្មាធិការគ្រប់គ្រង អាចធ្វើការផ្លាស់ប្ដូរតាមកាលវេលា ដែលអាចកើតឡើងពីការលាឈប់របស់បុគ្គលិក ឬការផ្លាស់ប្ដូររចនាសម្ព័ន្ធជាដើម។ ប្រធានក្រុមប្រឹក្សាមានទំនួលខុសត្រូវក្នុងការអនុម័តលើសមាជិកថ្មីរបស់ គណៈកម្មាធិការគ្រប់គ្រង ដោយធ្វើការពិគ្រោះយោបល់ជាមួយនឹងគណៈកម្មាធិការគ្រប់គ្រង។ បុគ្គលិកផ្សេងទៀតរបស់សមាគមអាដហុក ឬសមាជិកក្រុមប្រឹក្សាភិបាលអាចនឹងត្រូវអញ្ជើញឱ្យចូលរួមនៅក្នុងកិច្ចប្រជុំ គណៈកម្មាធិការគ្រប់គ្រងពីពេលមួយទៅពេលមួយតាមការចាំបាច់។ ប៉ុន្តែ នៅក្នុងកិច្ចប្រជុំទាំងនោះ ពួកគាត់មានតែតួនាទីផ្ដល់ធាតុចូល និងព័ត៌មានដែលគណៈកម្មាធិការគ្រប់គ្រងត្រូវការជាបាច់ប៉ុណ្ណោះ ដោយមិនចូលរួមនៅក្នុងដំណើរការធ្វើសេចក្ដីសម្រេចចិត្តនៅក្នុងគណៈកម្មាធិការគ្រប់គ្រងឡើយ។
គណៈកម្មាធិការគ្រប់គ្រង មានសមាសភាពសមាជិកសរុបចំនួន ៥ រូប (ប្រធាន អគ្គលេខាធិការ ប្រធានផ្នែកចំនួន ៣រូប រួមមាន ប្រធានផ្នែកសិទ្ធិមនុស្ស និងដីធ្លី ប្រធានផ្នែកសិទ្ធិស្រ្តី និងកុមារ ប្រធានផ្នែកហិរញ្ញវត្ថុ និងរដ្ឋបាល)។ គណៈកម្មាធិការគ្រប់គ្រង ត្រូវកោះប្រជុំយ៉ាងតិចបំផុតចំនួនពីរដងក្នុងមួយខែ។ គណៈកម្មាធិការគ្រប់គ្រង ធ្វើសេចក្ដីសម្រេចចិត្តតាមរយៈការមូលមតិរួមគ្នា (ឯកច្ឆន្ទៈ)។ ប្រសិនបើ ពុំមានការមូលមតិរួមគ្នាទេនោះ ត្រូវយកតាមសំឡេងភាគច្រើន ៥០%+១ សម្រាប់ការធ្វើសេចក្ដីសម្រេចចិត្តរបស់គណៈកម្មាធិការគ្រប់គ្រងដែលនឹងត្រូវភ្ជាប់កាតព្វកិច្ច (សូមមើលលក្ខខណ្ឌ យោងនៃគណៈកម្មាធិការគ្រប់គ្រងសម្រាប់ព័ត៌មានលម្អិតបន្ថែមអំពីតួនាទី និងទំនួលខុសត្រូវរបស់សមាជិកគណៈកម្មាធិការគ្រប់គ្រង)។
គណៈកម្មាធិការគ្រប់គ្រងមានសមាសភាពសមាជិកចំនួន ៥ រូបដូចខាងក្រោម៖
