ប្រជាពលរដ្ឋ សហគមន៍ រស្មីសែនជ័យ បានអំពាវនាវ ឲ្យសាលារាជធានីភ្នំពេញ ជួយដល់ ពួកគាត់ ដែលកំពុង ប្រឈម នឹងការ លំបាក ផ្នែកជីវភាព ប៉ុន្មានឆ្នាំ ក្រោយពី ត្រូវបាន បណ្ដេញ ចេញ ពីរាជធានីភ្នំពេញ។
លោក អាន វុទ្ធី ប្រធាន សហគមន៍ រស្មីសែនជ័យ ស្ថិតនៅភូមិតាគោ ឃុំជ្រៃលាស់ ស្រុកពញាឮ ខេត្តកណ្ដាល បានរៀបរាប់ ប្រាប់ក្រុម មន្ត្រីសង្គមស៊ីវិល មួយក្រុម ដែលបានចុះ ទៅអង្កេត នៅក្នុង សហគមន៍ នោះថា ជិតដប់ឆ្នាំ មកហើយ សហគមន៍ នេះពុំមាន ទឹកស្អាត ប្រើប្រាស់ សមាជិក សហគមន៍ ពុំមានមុខ របរ ច្បាស់លាស់ និងរស់នៅ ក្នុងផ្ទះ ដ៏ទ្រុឌទ្រោម តូចចង្អៀត។
សហគមន៍ ដែលត្រូវ បានបង្កើត ឡើងកាល ពីដើមឆ្នាំ ២០០៦នេះ គឺជា ទីតាំងសម្រាប់ ប្រជាពលរដ្ឋ ៤១៦គ្រួសារ ដែលត្រូវ បានបណ្ដេញ ចេញពី រាជធានី ភ្នំពេញ ប៉ុន្តែ ប្រធាន សហគមន៍ ខាងលើបាន បញ្ជាក់ថា មានតែ ៦០គ្រួសារ ប៉ុណ្ណោះ ដែលរស់ នៅពិត ប្រាកដ លើដីឡូតិ៍ ទំហំ ៦ម៉ែត្រគុណ ១២ម៉ែត្រ។
លោក អាន វុទ្ធី បានបន្ទោសសាលារាជធានីភ្នំពេញថា បានយកពួកគាត់មកបំបង់ចោល ដោយគ្មានការយកចិត្តទុកដាក់ ដែលធ្វើឲ្យពួកគាត់កាន់តែប្រឈមមុខនឹងជីវភាពលំបាក ជាពិសេសកុមារតូចៗពុំទទួលបានការអប់រំ ខណៈមនុស្សចាស់ប្រឈមមុខនឹងជំងឺផ្សេងៗ៕
