![20150819_155027[1]](http://adhoccambodia.org/wp-content/uploads/2015/08/20150819_1550271.jpg)
មន្ត្រីការពារសិទ្ធិមនុស្សអាដហុក បានលើកយកបញ្ហាការជួញដូរមនុស្ស និងការជួញដូរកម្លាំងពលកម្មទៅពិភាក្សាជាមួយមន្ត្រីជាន់ខ្ពស់នៃស្ថានទូតកម្ពុជាប្រចាំប្រទេសម៉ាឡេស៊ី នៅក្នុងជំនួបពិសេសមួយកាលពីថ្ងៃទី១៩ ខែសីហា ឆ្នាំ២០១៥កន្លងមកនេះ។
ក្នុងដំណើរចូលរួមកិច្ចប្រជុំដើម្បីពង្រឹងការងារជួយជនរងគ្រោះនៃការជួញដូរមនុស្ស និងការជួញដូរកម្លាំងពលកម្មឆ្លងដែននៅប្រទេសម៉ាឡេស៊ី អ្នកស្រី ឆន សុគន្ធា ប្រធានផ្នែកសិទ្ធិស្ត្រី និងកុមារ នៃសមាគមការពារសិទ្ធិមនុស្ស បានឲ្យដឹងថា អ្នកស្រី និងអ្នកស្រី លឹម មុន្នី មន្ត្រីអង្កេតជាន់ខ្ពស់នៃសមាគមអាដហុក បានជួបពិភាក្សាការងារជាមួយមន្ត្រីជាន់ខ្ពស់នៃស្ថានទូតកម្ពុជាប្រចាំប្រទេសម៉ាឡេស៊ី ក្នុងនោះមានលោក នូ ប៊ុណ្ណារ៉ា អគ្គលេខាធិការ អ្នកស្រី ណាគ្រី ស័រភ័ស្ស លេខាទី១ និងលោក ធួក ប៊ុនឆែល លេខាទី២ ប្រចាំស្ថានទូតកម្ពុជា។
នៅក្នុងជំនួបរយៈពេល ២ម៉ោងនោះ អ្នកស្រី ឆន សុគន្ធា បានលើកឡើងនូវបញ្ហាជាច្រើនជុំវិញការជួញដូរមនុស្ស និងការជួញដូរកម្លាំងពលកម្មឆ្លងដែនទៅកាន់ប្រទេសម៉ាឡេស៊ី ជាពិសេសចំណាត់ការយឺតយ៉ាវពីស្ថានទូតកម្ពុជាជួយដល់ពលករខ្មែរ ដែលរងការរំលោភបំពានក្រោមទម្រង់ផ្សេងៗ ដូចជា ការបង្ខំឲ្យធ្វើការលើសអាណត្តិគ្មានថ្លៃឈ្នួល រងទារុណកម្មលើរាងកាយ និងស្មារតី ការកាត់ផ្ដាច់ទំនាក់ទំនងជាមួយគ្រួសារនៅប្រទេសកំណើត ការបាត់ដំណឹង និងករណីស្លាប់ពលករខ្មែរជាដើម។
ជាការឆ្លើយតបមកវិញ មន្ត្រីស្ថានទូតកម្ពុជាប្រចាំប្រទេសម៉ាឡេស៊ី បានបង្ហាញនូវឧបសគ្គនានា ដែលនាំឲ្យស្ថានទូតកម្ពុជាពុំអាចជួយដល់ពលករកម្ពុជានៅប្រទេសម៉ាឡេស៊ី ដូចជា គ្មានលេខទំនាក់ទំនង ឪពុកម្ដាយទាមទារលុយពីកូនរបស់ពួកគេច្រើនពេក ពលការិនីខ្លះបានព្យាយាមប្ដូរការងារដោយគ្មានហេតុផលច្បាស់លាស់ ក្រុមហ៊ុននាំពលករិនីខ្លះបានសូកប៉ាន់ប៉ូលិសម៉ាឡេស៊ីដើម្បីទទួលបានប័ណ្ណការងារ ប៉ូលិសម៉ាឡេស៊ីប្រព្រឹត្តអំពើពុករលួយជាថ្នូរនឹងការដោះលែងពលករខុសច្បាប់ ពលការិនីខ្លះបានគេចចេញពីកន្លែងការងារ ហើយថៅកែជនជាតិម៉ាឡេស៊ីបដិសេធផ្ដល់សំណងដល់ជនរងគ្រោះកម្ពុជា ជាដើម។
ក្នុងដំណើរទស្សនកិច្ចនេះ មន្ត្រីសមាគមអាដហុក ក៏បានស្វែងរកកិច្ចអន្តរាគមន៍ជាបន្ទាន់ពីអង្គការដៃគូអន្តរជាតិមួយចំនួន ដើម្បីជួយពលរដ្ឋកម្ពុជា ៤រូប ដែលត្រូវបានមេខ្យល់យកទៅលក់ឲ្យថៅកែម៉ាឡេស៊ី និងបង្ខំឲ្យធ្វើការងារយ៉ាងធ្ងន់ធ្ងរនៅក្នុងកសិដ្ឋានមួយកន្លែងក្នុងខេត្តឡាំកាត់។ ពលករទាំង ៤រូប (ក្នុងនោះខ្លះជាអនីតិជន)ត្រូវបានជួយសង្គ្រោះទាន់ និងគ្រោងវិលត្រឡប់មកកាន់ប្រទេសកម្ពុជាវិញនាពេលខាងមុខ៕
