អង្គការសង្គមស៊ីវិលជិត ៣០ស្ថាប័ន បានផ្ញើលិខិតចំហមួយដល់ព្រះមហាក្សត្រ នរោត្ដម សីហមុនី ដោយបានជម្រុញឲ្យព្រះអង្គព្រះរាជតម្រិះទៅលើការឡាយព្រះហស្តលេខាលើសំណើច្បាប់គ្រប់គ្រងអង្គការសង្គមស៊ីវិលដ៏ចម្រូងចម្រាស់។
សេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ត្រូវបានសមាជិកសភា និងសមាជិកព្រឹទ្ធសភាមកពីគណបក្សកាន់អំណាច អនុម័តរួចរាល់ហើយកាលពីថ្ងៃទី១៣ និងថ្ងៃទី២៤ ខែកក្កដា ឆ្នាំ២០១៥កន្លងមកថ្មីៗនេះ។ សេចក្ដីព្រាងច្បាប់នេះ កំពុងស្ថិតនៅស្ថាប័នក្រុមប្រឹក្សាធម្មនុញ្ញ ដើម្បីពិនិត្យសម្រេច មុននឹងបញ្ជូនទៅព្រះមហាក្សត្រ។
ក្នុងលិខិតចំហចុះថ្ងៃទី៣០ ខែកក្កដា ឆ្នាំ២០១៥ សមាគម និងអង្គការមិនមែនរដ្ឋាភិបាលចំនួន ២៦ស្ថាប័ន បានស្នើសុំអន្តរាគមន៍ពីព្រះមហាក្សត្រទៅលើសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ដើម្បីធានាជាផ្លូវការនូវសិទ្ធិ និងសេរីភាពរបស់ប្រជាពលរដ្ឋទាំងអស់ ដែលមានចែងក្នុងរដ្ឋធម្មនុញ្ញ និងកតិកាសញ្ញាសិទ្ធិមនុស្សអន្តរជាតិ។
សេចក្ដីព្រាងច្បាប់នេះ ត្រូវបានអង្គការសង្គមស៊ីវិលជាតិ និងអន្តរជាតិ ចាត់ទុកជាឧបករណ៍នយោបាយរបស់រដ្ឋាភិបាលដឹកនាំដោយគណបក្សកាន់អំណាច ដើម្បីរឹតត្បិតលើសេរីភាពរបស់អង្គការសង្គមស៊ីវិលនៅកម្ពុជា៕
