សមាគមការពារសិទ្ធិមនុស្សអាដហុក នៅព្រឹកថ្ងៃទី០៤ ខែឧសភា ឆ្នាំ២០១៥ បានរៀបចំវគ្គបណ្ដុះបណ្ដាលស្ដីពីការដោះស្រាយទំនាស់ក្រៅប្រព័ន្ធតុលាការ នៅរាជធានីភ្នំពេញ។
ថ្លែងនៅឯពិធីបើកវគ្គបណ្ដុះបណ្ដាល លោក ធន សារាយ ប្រធានសមាគមការពារសិទ្ធិមនុស្សអាដហុក បានមានប្រសសាសន៍ថា វគ្គបណ្ដុះបណ្ដាលមានរយៈពេល ៤ថ្ងៃនេះ មានគោលបំណងផ្លាស់ប្ដូរបទពិសោធន៍ក្នុងចំណោមបុគ្គលិកមកពីតាមបណ្ដាខេត្តទាំងអស់ និងស្វែងរកចំណុចខ្វះខាតនៃយន្តការដោះស្រាយទំនាស់ក្រៅប្រព័ន្ធតុលាការ ដែលត្រូវបានអនុវត្តកន្លងមកហើយ។
យន្តការដោះស្រាយទំនាស់ក្រៅប្រព័ន្ធតុលាការ ត្រូវបានសមាគមអាដហុកចាប់ផ្ដើមឡើងនៅឆ្នាំ២០១៣។ កម្មវិធីនេះ មានបំណងកែលម្អការស្វែងរកយុត្តិធម៌សម្រាប់ប្រជាពលរដ្ឋកម្ពុជាតាមរយៈការពង្រឹងយន្តការដោះស្រាយទំនាស់ក្នុង និងក្រៅប្រព័ន្ធតុលាការ និងកសាងការសន្ទនា និងកិច្ចសហការរវាងអាជ្ញាធរមូលដ្ឋាន និងសហគមន៍៕
