សមាគមការពារសិទ្ធិមនុស្ស និងអភិវឌ្ឍន៍នៅកម្ពុជាហៅកាត់ថា (អាដហុក) សូមសំដែងនូវការខកចិត្តជាខ្លាំងពីរបៀបនៃការបញ្ជូនពលករចំណាកស្រុកខ្មែរចេញពីប្រទេសថៃដែលពុំមានលក្ខណៈស៊ីវិល័យអមនុស្សធម៌ដែលនាំឲ្យមានការរំលោភដ៏ធ្ងន់ធ្ងរដល់សិទ្ធិរបស់ពលករចំណាកស្រុកទាំងនោះ។
របៀបបណ្តេញពលករចំណាកស្រុកពីប្រទេសថៃនេះ ធ្វើឡើងដោយការបំភិតបំភ័យពីអាជ្ញាធរយោធាថៃ ធ្វើឲ្យមានការតក់ស្តុតជាខ្លាំងដល់ស្មារតីរបស់ពលករចំណាកស្រុកជាទូទៅ។ វិធីដែលធ្វើឲ្យមានការតក់ស្តុតជាខ្លាំងនេះគឺពលករចំណាកស្រុកពិតជាបានទទួលការគំរាកំហែង មបំបាក់ស្មារតី បំភិតបំភ័យ ធ្វើទារុណកម្ម និងការប្រើអំពើហិង្សា ផ្សេងៗទៀតដែលនាំឲ្យប៉ះពាល់ដល់អាយុជីវិតពលករកម្ពុជាមួយចំនួន។ យើងបានសំភាសសាក្សីឃើញផ្ទាល់ភ្នែក ដែលបានបញ្ជាក់ពីមូលហេតុដែលធ្វើឲ្យមានឧបទ្ទវហេតុគ្រោះថ្នាក់ចរាចរណ៍រហូតមានការស្លាប់នេះ គឺដោយសារការបាញ់សម្លុតគំរាមកំហែងពីយោធាថៃនេះឯង។ សាក្សីខ្លះទៀតបានឃើញហេតុការណ៍នៃការបាញ់សម្លាប់ពីយោធាថៃមកលើពលករចំណាកស្រុកខ្លះដែលព្យាយាមគេចពីការចាប់ខ្លួនពួកគេ។ ក្រៅពីនេះពលករខ្មែរចំណាកស្រុកមួយចំនួនទៀតត្រូវបានទទួលរងនូវការដកហូតប្រាក់កាសតាមទំនើងចិត្ត ហើយចាប់បញ្ជូនមកកម្ពុជាវិញដូចសត្វធាតុ។
សមាគមអាដហុកមានការសោកស្តាយជាខ្លាំងដែលប្រទេសទាំង ១០ ក្នុងតំបន់អាស៊ីអាគ្នេយ៍កំពុងតែត្រៀមចូលជា «សហគមន៍តែមួយ និងមានវាសនាតែមួយ» នៅឆ្នាំ ២០១៥ ខាងមុខ បែរជាមានរដ្ឋជាសមាជិកអាស៊ានមួយរំលោភសិទ្ធិយ៉ាងធ្ងន់ធ្ងរទៅប្រជាជននៃរដ្ឋផ្សេងទៀតនៃសហគមន៍អាស៊ានបែបនេះ។ យើងសូមសួរថា៖ តើប្រជាជនក្រីក្រក្នុងប្រទេសជាសមាជិកអាស៊ាន មិនមែនជាប្រជាជនអាស៊ានទេឬ ម្តេចបានជាប្រមាថកាតទានពលករក្រីក្រក្នុងប្រទេសអាស៊ានបែបនេះ? ព្រោះថាបើចាត់ទុកប្រជាជននៃប្រទេសនានាក្នុងអាស៊ានជាប្រជាជនអាស៊ានដូចគ្នា រដ្ឋជាសមាជិកអាស៊ានគួរតែមានវិធានការដែលមានលក្ខណៈស៊ីវិល័យ គោរពសិទ្ធិមនុស្ស គោរពកិត្តិយស និងសេចក្តីថ្លែថ្នូ និងគោរពស្មារតីនៃធម្មនុញ្ញអាស៊ានទៅលើពលករដែលមកពីប្រទេសអាស៊ានដូចគ្នា។
យើងយល់ថារដ្ឋអំណាចយោធាថៃមានសិទ្ធិក្នុងការបណ្តេញចេញនូវពលករចំណាកស្រុកដែលពុំមានឯកសារស្របច្បាប់ តែគួរធ្វើឡើងតាមវិធីដែលមានលក្ខណៈមនុស្សធម៌ គោរពសិទ្ធិ និងសេចក្តីថ្លៃថ្នូររបស់ពលករកម្ពុជា ដោយធ្វើសេចក្តីប្រកាសជាទូទៅដល់ពលករចំណាកស្រុកពុំមានឯកសារស្របច្បាប់ឲ្យធ្វើការចាកចេញដោយស្ម័គ្រចិត្តក្នុងថេរវេលាសមស្របមួយជាកំណត់សិន។ នៅពេលហួសកាលកំណត់នេះ បើពលករណាពុំព្រមចាកចេញ សឹមធ្វើការចាប់ខ្លួន ផាកពិន័យ ឬបញ្ជូនខ្លួនមកប្រទេសដើមរបស់ខ្លួនវិញ។ ទន្ទឹមនឹងនេះរដ្ឋអំណាចយោធាថៃគួរតែធ្វើកចិ្ចសហការជាមួយនឹងរដ្ឋាភិបាលដែលមានពលករនៅក្នុងប្រទេសខ្លួនឲ្យត្រៀមរៀបចំទទួលពលករដែលបញ្ជូនចេញនេះឲ្យបានត្រឹមត្រូវ។
ដើម្បីដោះស្រាយនូវបញ្ហាខាងលើឲ្យបានត្រឹមត្រូវតាមស្មារតីនៃធម្មនុញ្ញអាស៊ាន «សហគមន៍តែមួយ វាសនាតែមួយ» និងអនុលោមតាមគោលការណ៍សិទ្ធិមនុស្សជាសកល៖
- ប្រទេសទទួលពលករចំណាកស្រុកគួរតែបង្កលក្ខណៈងាយស្រួលក្នុងការផ្តល់សិទ្ធិធ្វើការងារស្របច្បាប់ឲ្យបានច្រើនតាមតម្រូវការនៃទីផ្សារការងាររបស់ខ្លួន។ មិនត្រូវបណ្តេញពលករចំណាកស្រុកដូចដែលបានធ្វើរួចមកហើយនេះទៀតទេ។
- ប្រទេសបញ្ជូនពលករចំណាកស្រុក (រាជរដ្ឋាភិបាលកម្ពុជាជាដើម) គួរតែមានវិធានការបង្កើតការងារសំរាប់ប្រជាជនរបស់ខ្លួនឲ្យបានជាអតិបរិមាដើម្បីកាត់បន្ថយការធ្វើចំណាកស្រុក។
- រាជរដ្ឋាភិបាលកម្ពុជាគួរតែមានវិធានការផ្តល់លំនៅដ្ឋាន និងដីធ្លីឲ្យបានគ្រប់គ្រាន់ជូនដល់ពលករដែលត្រឡប់មកប្រទេសវិញដែលពុំមានលំនៅដ្ឋាន និងដីធ្លីសំរាប់ចិញ្ចឹមជីវិត។
- អាស៊ានគួរតែជំរុញឲ្យបានឆាប់ក្នុងការបង្កើតគណៈកម្មការអាស៊ានពីសិទ្ធិពលករចំណាកស្រុកដើម្បីជួយការពារ និងលើកស្ទួយដល់សិទ្ធិរបស់ពលករចំណាកស្រុកក្នុងតំបន់អាស៊ាន។
សំរាប់ព័ត៌មានលំអិតសូមទាក់ទង៖
– លោក ធន សារាយ ប្រធានសមាគមអាដហុក ០១៦ ៤៤ ០០ ៤៤ ភាសារខ្មែរ អង់គ្លេស និងបារាំង
– លោក នី ចរិយា ប្រធានផ្នែកសិទិ្ធមនុស្ស និងជំនួយផ្លូវច្បាប់ ០១១ ២៧ ៤៩ ៥៩ ភាសារខ្មែរ អង់គ្លេស
– អ្នកស្រី ឆន សុគន្ធា ប្រធានផ្នែកស្រី្ត កុមារ និងដោះស្រាយទំនាស់ក្រៅប្រព័ន្ធតុលាការ ០១២ ៣៤៤ ៧១៩ ភាសារខ្មែរ និងអង់គ្លេស
