សេចក្ដីប្រកាសពត៌មាន ព្រះរាជអាជ្ញារងអមតុលាការ ខេត្តបន្ទាយមានជ័យពន្យាពេល សាកសួរ លោក ស៊ុំ ច័ន្ទគា
នៅថ្ងៃទី២០ ខែកុម្ភៈ ឆ្នាំ២០១២ ជាថ្ងៃដែល កញ្ញាព្រះរាជអាជ្ញារង យិន សុគន្ធារី ត្រូវ ធ្វើការសាកសួរ លោក ស៊ុំ ច័ន្ទគា តាមដីការកោះ ចុះថ្ងៃទី៩ ខែកុម្ភៈ ឆ្នាំ២០១២។ ក៏ប៉ុន្តែគួរអោយ សោកស្ដាយ ដោយសារតែ ដំណើរការ សាកសួរត្រូវបាន ពន្យាពេលដោយ កញ្ញា ព្រះរាជអាជ្ញារង មានធុរៈ ដោយសារ ម្ដាយរបស់កញ្ញាមានជម្ងឺជាទំងន់ បើតាមការអះអាងរបស់ កញ្ញាព្រះរាជអាជ្ញា តាមទូរស័ព្ទកាល ពីថ្ងៃទី១៩ ខែកុម្ភៈ ឆ្នាំ២០១២។ បើទោះបីជា មានការពន្យាពេល ការសាកសួរករណីរបស់ លោក ស៊ុំ ច័ន្ទគា ក៏ដោយចុះ ក៏លោក ស៊ុំ ច័ន្ទគា មេធាវីរបស់លោក និង លោក នី ចរិយា ប្រធានផ្នែកស៊ើបអង្កេត សមាគមអាដហុក បានចូលទៅការិយល័យ ព្រះរាជអាជ្ញាអមសាលាដំបូង ខេត្តបន្ទាយមានជ័យ និងបានឃើញបញ្ហាមួយចំនួនដែលមានទំនាក់ទំនង ទៅនឹងករណីលោក ស៊ុំ ច័ន្ទគា ដែលធ្វើអោយមានជាសំនួរឡើងគឺ៖
១. ហេតុអ្វីបានជានៅពេលដែល កញ្ញាព្រះរាជអាជ្ញា អវត្តមាន ហើយមិនទុកសំណុំរឿងអោយ ព្រះរាជអាជ្ញារងផ្សេងទៀតធ្វើការបន្ត ដូចករណីផ្សេងៗ នាពេលកន្លងមក?
២. ជាហេតុចៃដន្យបំផុតនៅពេលដែល កញ្ញាព្រះរាជអាជ្ញារង អវត្តមាន លោកព្រះរាជអាជ្ញាអមតុលាការសាលាដំបូងខេត្តបន្ទាយមានជ័យ លោក ផាន់ វណ្ណរ័ត្ន ក៏អវត្តមានផងដែរ?
ព្រអរាជអាជ្ញាទាំងពីររូប ជាអ្នកកាន់រឿងក្ដី ដែលមានទំនាក់ទំនងគ្នា គឺ លោក ផាន់ សុវណ្ណរ័ត្ន ជាអ្នកកាន់ រឿងក្ដីដែល កញ្ញា ហ៊ី ធាវី ប្ដឹង លោក អ៊ុំ សុជាតិ ពីបទប្រទូស្តកេរ្តិ៍ ចំណែក កញ្ញាព្រះរាជអាជ្ញា យិន សុគន្ថារី ជាអ្នកកាន់ រឿងក្ដីដែល លោក អ៊ុំ សុជាតិ ប្ដឹង លោក ស៊ុំ ច័ន្ទគា ដោយសារតែ លោក ស៊ុំ ច័ន្ទគា បានធ្វើអន្តរាគមន៏ ករណីបណ្ដឹង កញ្ញា ហ៊ី ធាវី ប្ដឹងលោក អ៊ុំ សុជាតិ។
ភ្នំពេញ, ថ្ងៃទី២០ ខែកុម្ភៈ ឆ្នាំ២០១២
ពត៌មានបន្ថែម សូមទំនាក់ទំនង
លោក នី ចរិយា ប្រធានផ្នែកស៊ើបងង្កេត ០១១ ២៧ ៤៩ ៥៩
លោក ចាន់ សូវ៉េត អនុប្រធានផ្នែកស៊ើបងង្កេត ០១៦ ៩៣ ៧៥ ៩១
