តុលាការខេត្តសៀមរាប នៅថ្ងៃទី១៧ ខែមិថុនា ឆ្នាំ២០១៥នេះ បាន និងកំពុងដំណើរការសវនការជម្រះក្ដីលើប្រជាពលរដ្ឋ ២រូប ដែលជាប់ចោទពីបទបំផ្លិចបំផ្លាញទ្រព្យសម្បត្តិឯកជន នៅក្នុងជម្លោះដីធ្លីដ៏ចម្រូងចម្រាស់មួយជាមួយសហគមន៍តាខ្មៅ ដែលកាន់កាប់ដោយជនជាតិវៀតណាម។
លោក បឿន សុខ និងលោក វ៉ែន ឡន ត្រូវបានអាជ្ញាធរខេត្តសៀមរាបចាប់ខ្លួនកាលពីដើមខែមករា ឆ្នាំ២០១៥ ក្រោមការចោទប្រកាន់ពីបទបំផ្លិចបំផ្លាញទ្រព្យសម្បត្តិឯកជន តាមបណ្ដឹងរបស់សហគមន៍តាខ្មៅ ដែលកាន់កាប់ដីជាង ៤០០ហិកតានៅក្នុងខេត្តនេះ។ ការចាប់ខ្លួនប្រជាពលរដ្ឋទាំងពីររូបនេះ ត្រូវបានសមាគមការពារសិទ្ធិមនុស្សអាដហុក ចាត់ទុកថា ធ្វើឡើងខុសនីតិវិធីច្បាប់។
លោក នី ចរិយា ប្រធានផ្នែកសិទ្ធិមនុស្សនៃសមាគមអាហុក ដែលបានចូលរួមឃ្លាំមើលសវនការដោយផ្ទាល់ បានឲ្យដឹងថា សវនការដែលមានលោកចៅក្រម កុយ សៅ ជាប្រធានអង្គជំនុំជម្រះ ត្រូវបានធ្វើឡើងជាសាធារណៈ ដោយមានការចូលរួមឃ្លាំមើលពីសំណាក់ក្រុមសកម្មជនការពារសិទ្ធិមនុស្ស និងអ្នកសារព័ត៌មាន។
លោកបន្ថែមថា សវនការដែលបន្តធ្វើឡើងនៅរសៀលម៉ោង ៣ថ្ងៃដដែលនេះ គឺជាការស្ដាប់ការបកស្រាយរបស់មេធាវីចុងចោទ បន្ទាប់ពីការបកស្រាយរបស់ភាគីព្រះរាជអាជ្ញា បានបញ្ជាប់នៅក្នុងសវនការកាលពីព្រឹកថ្ងៃតែមួយនេះ។
សកម្មជនការពារសិទ្ធិមនុស្សរូបនេះ បានចាត់ទុកសវនការដោយចំហរនេះ ជាគំរូសម្រាប់ស្ថាប័នតុលាការដទៃទៀតនៅទូទាំងប្រទេសកម្ពុជា ដើម្បីជួយដល់ប្រជាពលរដ្ឋជាច្រើន ដែលរងការរំលោភបំពានសិទ្ធិសេរីភាព និងដីធ្លីពីសំណាក់បុគ្គលមានអំណាច និងមានទ្រព្យសម្បត្តិ៕
