អង្គការការពារអ្នកការពារសិទ្ធិមនុស្សអន្តរជាតិ ដែលមានមូលដ្ឋាននៅប្រទេសស្វីស បានថ្កោលទោសយ៉ាងខ្លាំងក្លាទៅនឹងការគំរាមកំហែងតាមផ្លូវតុលាការទៅលើលោក នី ចរិយា អ្នកការពារសិទ្ធិមនុស្សឈានមុខម្នាក់នៅកម្ពុជា។
លោក នី ចរិយា ប្រធានផ្នែកសិទ្ធិមនុស្ស និងជំនួយផ្លូវច្បាប់ នៃសមាគមការពារសិទ្ធិមនុស្សអាដហុក ត្រូវបានមន្ត្រីតុលាការខេត្តសៀមរាប ២រូប ប្ដឹងពីបទបរិហារកេរ្តិ៍ជាសាធារណៈ បរិហារបង្កាច់កេរ្តិ៍ និងធ្វើអត្ថាធិប្បាយដើម្បីដាក់សម្ពាធលើតុលាការ។
បន្តឹងប្រឆាំងលើអ្នកការពារសិទ្ធិមនុស្សរូបនេះ បានកើតឡើងប៉ុន្មានសប្ដាហ៍ក្រោយពីលោកបានថ្លែងនៅក្នុងសន្និសីទកាសែតកាលពីខែឧសភាកន្លងមកថា ពលរដ្ឋ ២រូបមកពីភូមិជប់រំដេង ឃុំកន្ទួត ស្រុកស្វាយលើ ខេត្តសៀមរាប ត្រូវបានចោទប្រកាន់ និងឃុំខ្លួនដោយខុសនីតិវិធី ពាក់ព័ន្ធនឹងសំណុំរឿងជម្លោះដីធ្លីរវាងប្រជាពលរដ្ឋនៅភូមិជប់រំដេង និងសហគមន៍តាខ្មៅអភិវឌ្ឍន៍កសិកម្ម និងឧស្សាហកម្ម។
លោក នី ចរិយា ដែលបានរិះគន់ភាពមិនប្រក្រតីនៃប្រព័ន្ធតុលាការកម្ពុជានោះ ត្រូវបានសាលាដំបូងរាជធានីភ្នំពេញកោះហៅចូលបំភ្លឺកាលពីថ្ងៃទី១៣ ខែកក្កដាកន្លងមកថ្មីៗនេះ ហើយសំណុំរឿងនេះក៏ត្រូវបានព្រះរាជអាជ្ញាបញ្ជូនទៅចៅក្រមស៊ើបសួរនៅប៉ុន្មានថ្ងៃក្រោយមក។
នៅក្នុងលិខិតថ្កោលទោសមួយចេញកាលពីថ្ងៃទី២២ ខែកក្កដា ឆ្នាំ២០១៥ ក្រុមអ្នកអង្កេតការណ៍អន្តរជាតិដើម្បីការពារអ្នកការពារសិទ្ធិមនុស្ស បានចាត់ទុកចំណាត់ការរបស់តុលាការកម្ពុជា ត្រូវបានធ្វើឡើងក្នុងបំណងដាក់ទណ្ឌកម្មប្រឆាំងនឹងសកម្មភាពការពារសិទ្ធិមនុស្សដោយស្របច្បាប់របស់អ្នកការពារសិទ្ធិមនុស្សរូបនេះ។
ក្រុមឃ្លាំមើលអន្តរជាតិមួយនេះ ក៏បានទាមទារឲ្យអាជ្ញាធរកម្ពុជាបញ្ចប់ការគំរាមកំហែង និងបំផិតបំភ័យទៅលើសកម្មជនការពារសិទ្ធិមនុស្សទាំងអស់នៅកម្ពុជា និងគោរពតាមគោលការណ៍នៃសេចក្ដីថ្លែងការណ៍អង្គការសហប្រជាជាតិស្ដីពីអ្នកការពារសិទ្ធិមនុស្សអន្តរជាតិ ដែលត្រូវបានអនុម័តដោយសន្និបាតអង្គការសហប្រជាជាតិកាលពីថ្ងៃទី០៩ ខែធ្នូ ឆ្នាំ១៩៩៨។
បន្ដឹងប្រឆាំងលើសកម្មជនការពារសិទ្ធិមនុស្សឈានមុខរូបនេះ ទទួលរងនូវការថ្កោលទោសយ៉ាងខ្លាំងក្លាពីអង្គការអន្តរជាតិនានា ដែលឃ្លាំមើលស្ថានភាពសិទ្ធិមនុស្សនៅកម្ពុជា ក្នុងនោះមានអង្គការ Frontline Defenders មានមូលដ្ឋាននៅទីក្រុងឌូភ្លីន ប្រទេសអៀឡង់ គណៈកម្មការអ្នកច្បាប់អន្តរជាតិ មានមូលដ្ឋាននៅទីក្រុងបាងកក ប្រទេសថៃ ជាដើម៕
