ការបណ្តេញចេញប្រជាពលរដ្ឋបូរីកីឡា ពីលំនៅដ្ឋាន
នៅថ្ងៃទី០៣ ខែមករា ឆ្នាំ២០១២ គិតចាប់ពីម៉ោង៦ព្រឹក ដល់ម៉ោង ១១ព្រឹក សមត្ថកិច្ចចម្រុះរួមមានប៉ូលិស ប៉េអឹម កម្លាំងសន្តិសុខ ក្រុមហ៊ុនផានពីមិច មន្រ្តីមូលដ្ឋាន និងក្រុមកម្មករស៊ីឈ្នួល សរុប ប្រមាណ៥០០នាក់គាំទ្រដោយឡានទឹក៤គ្រឿង ត្រាក់ទ័រ២គ្រឿង និងប្រដាប់ដោយខែល ដំបងឆក់ ដំបង អាវុធខ្លីវែង អាវុធបាញ់ ឧស្ម័នបង្ហូរទឹកភ្នែក បានវាយសម្រុកចូល និងវាយកំទេច លំនៅដ្ឋាន ប្រជាពលរដ្ឋ និងចាប់ខ្លួនប្រជាពលរដ្ឋបាន១១នាក់ក្នុងនោះមានបុរស់ចំនួន ៨នាក់ ក្នុងនោះ មានកុមារម្នាក់, ស្រ្តីម្នាក់ និងយោធាចំនួន៣នាក់នៅកងអង្គរក្សប្រចាំខេត្តព្រះវិហារ ដែល មកលេងនៅផ្ទះ(ព័ត៌មានចុងក្រោយមានការដោះលែងកុមារម្នាក់និងយុវជនម្នាក់នៅពេល រសៀល នេះ) ។ ភាគីទាំងសងខាង បានរង របួសដោយសារការគប់ដំថ្មដាក់គ្នាទៅវិញទៅមកអស់ជាច្រើនម៉ោងបណ្តាលឲ្យកងកម្លាំងសមត្ថកិច្ចចំនួន៣នាក់ រងរបួស,កម្មករស៊ីឈ្នួល២នាក់រងរបួស ស្រាល ចំណែកភាគី ប្រជាពលរដ្ឋ សម្រាប់អ្នកចាប់ខ្លួនបាននោះគឺមានរបួសទាំងអស់ គឺដោយ សារ ការ វាយដំបន្ថែមពីកងកម្លាំងក្រោយចាប់ខ្លួន រីឯ ប្រជាពលរដ្ឋផ្សេងៗទៀតនៅមិនទាន់ដឹងនៅឡើយ ព្រោះពួកគេ មួយចំនួនបានរត់គេចខ្លួនពីការតាមចាប់ របស់សមត្ថកិច្ច ។
នៅទីបំផុតប្រជាពលរដ្ឋបូរីកីឡា៣៩២គ្រួសារ ដែលមានទំនាស់ដ៏រ៉ាំរ៉ៃ អស់រយៈពេលជិត៨ឆ្នាំជាមួយក្រុមហ៊ុនផានពីមិច ត្រូវបានកងកម្លាំងចម្រុះរាជធានីភ្នំពេញ វាយបង្រ្កាប បំផ្លិចបំផ្លាញទ្រព្យសម្បត្តិ រុះរើលំនៅដ្ឋាន បណ្តេញចេញ ពីផ្ទះសម្បែងបង្ខំឲ្យទៅរស់ជាយរាជធានីភ្នំពេញចម្ងាយប្រហែល១៦គីឡូមែត្រ ភាគខាងលិច ចំណុចទួលសម្បូរ និងវត្តភ្នំបាត ។ការប៉ះទង្គិចគ្នាអស់ជាច្រើនម៉ោងគិតពីម៉ោង៧ព្រឹក ដល់ម៉ោង ១១ព្រឹក ដោយកងកម្លាំងចម្រុះប្រើអាវុធបាញ់គំរាមកំហែង បាញ់ឧស្ម័នបង្ហូរទឹកភ្នែក យកដំថ្មគប់តបតជាមួយ ប្រជាពលរដ្ឋវិញ ចំណែកភាគីខាងប្រជាពលរដ្ឋដែលហ៊ានចេញមុខប្រឆាំងតវ៉ា បានប្រើវិធីការពារលំនៅដ្ឋានដោយប្រើដំថ្ម, យកដបគប់ទៅលើសមត្ថកិច្ច, យកគំនរសម្រាមដាក់បិទផ្លូវមានឈើ ដែក ដំបងជាដើម ដើម្បីរារាំងកងកម្លាំងចម្រុះមិនឲ្យចូលមកលំនៅដ្ឋានបាន ។
ក្រោយហេតុការណ៍ប៉ះទង្គិចដែលកើតឡើងរវាងកងកម្លាំងប្រដាប់អាវុធជាមួយប្រជាពលរដ្ឋ កម្លាំងរបស់ក្រុមហ៊ុនក៏បានចូលទៅឈូសឆាយលំនៅដ្ឋានដោយមិន ការសួរនាំបើទោះជាមានការស្នើសុំពីប្រជាពលរដ្ឋទុកឲ្យពួកគេរុះរើដោយខ្លួនឯងក៏ដោយកម្លាំងកម្មករទាំងនោះ មិនព្រមដែរ ។នៅរសៀលនេះផ្ទះជាង៣០០ខ្នងត្រូវបានបំផ្លាញ ដោយមិនគិតអំពីការខូចខាតទ្រព្យ សម្បត្តិប្រជាពលរដ្ឋឡើយ តែបើប្រជាពលរដ្ឋហ៊ានចេញមុខតវ៉ានោះគេនិងចាប់ខ្លួនជាក់ជាមិនខាន ។ នៅក្នុងហេតុការណ៍ចុងក្រោយនេះមិនមានការចេញមុខមកទទួលខុសត្រូវចំពោះប្រជាពលរដ្ឋគ្រោះថាតើពួកគេ ត្រូវបញ្ជូនទៅទីតាំងណាមួយពិតប្រាកដនៅឡើយ តើក្រុមហ៊ុនត្រូវចេញលុយតាមរបៀបណា ហើយថាតើសាលា រាជធានីចាត់ការដូចមេ្តចក្នុងករណីនេះ ។ មួយវិញទៀតប្រជាពលរដ្ឋមួយចំនួនដែលត្រូវបានចាប់ខ្លួននោះថាតើពួកគាត់អាចត្រូវបានដោះលែងវិញឬយ៉ាងណា ឬត្រូវសមត្ថកិច្ចកសាងសំណុំរឿងបញ្ជូនទៅតុលាការដើម្បីចាត់វិធានការផ្លូវច្បាប់ ។
សេចក្តីសន្និដ្ឋាន
ក្រោមទឹកភ្នែកស្រែកទ្រហោរយំទាំងក្មេងទាំងចាស់ពេលដែលកងកម្លាំងចម្រុះសម្រុកចូលបានជោគជ័យ ដោយមកនូវគ្រឿងចក្រត្រាក់ទ័រមួយគ្រឿង និង ប៊ុលដូសឺមួយគ្រឿង បានទៅរុញឈូសលំនៅដ្ឋានទ្រព្យ ដួលរលំបាក់ខូចខាតខ្ទេចខ្ទីគ្មានសល់ ។ ជុំវិញហេតុការណ៍បណ្តេញប្រជាពលរដ្ឋបូរីកីឡាចេញពីលំនៅដ្ឋាននេះ គឺជាការរំលោភសិទិ្ធមនុស្សយ៉ាង ធ្ងន់ធ្ងរ បានបង្ខំឲ្យប្រជាពលរដ្ឋជាង៣០០គ្រួសារចេញពីលំនៅដ្ឋានដោយគ្មានសំណងសមរម្យ។ ការប្រើប្រាស់កងកម្លាំងសាធារណៈដ៏ច្រើនសន្ធឹកសន្ធាប់បែបនេះគឺជាការគំរាមកំហែងអាយុជីវិត ការដកហូតទ្រព្យសម្បត្តិខុសច្បាប់ និងពុំមានផ្តល់សំណងត្រឹមត្រូវ និងសមរម្យ ។ សកម្មភាពរបស់កងកម្លាំងប្រដាប់អាវុធមិនជាការអនុវត្តន៍ច្បាប់ទេ គឺជាការប្រើកម្លាំងសាធារណៈមកបណ្តេញប្រជាពលរដ្ឋចេញពីលំនៅដ្ឋានដោយបង្ខំនិងរំលោភសិទិ្ធមនុស្ស ដែលមិនអាចទទួលយកបាន ។
ភ្នំពេញ, ថ្ងៃទី០៣ ខែមករា ឆ្នាំ២០១២
សំណូមពរ
១)សុំឲ្យមានការដោះលែងអ្នកដែលត្រូវចាប់ខ្លួនទាំងអស់
២)សុំជួយដោះស្រាយបញ្ហាជីវភាពនៅពេលខាងមុខនេះ
៣)សុំជួយផ្តល់មេធាវីដើម្បីការពារប្រជាពលរដ្ឋ ដែលត្រូវបានគេចាប់ខ្លួន
