លោក នី ចរិយា ប្រធានផ្នែកសិទ្ធិមនុស្ស និងច្បាប់ នៃសមាគមការពារសិទ្ធិមនុស្សអាដហុក បានអះអាងថា លោកបានបង្ហាញឯកសារ និងភស្តុតាងគ្រប់គ្រាន់ ដែលបញ្ជាក់ថា លោកមិនបានបរិហារកេរ្តិ៍មន្ត្រីតុលាការខេត្តសៀមរាប ២រូបនោះឡើយ។
ថ្លែងប្រាប់អ្នកយកព័ត៌មាននៅក្រោយចូលបំភ្លឺក្នុងសាលាដំបូងរាជធានីភ្នំពេញ លោកបាននិយាយថា បណ្ដឹងរបស់មន្ត្រីតុលាការខេត្តសៀមរាប ពុំមានលក្ខណៈសម្បត្តិគ្រប់គ្រាន់នោះឡើយ។
លោក នី ចរិយា ត្រូវបានលោក សុក កែវបណ្ឌិត ព្រះរាជអាជ្ញារង និងលោក គឺ ឫទ្ធី ចៅក្រមស៊ើបសួរនៃសាលាដំបូងខេត្តសៀមរាប ប្ដឹងពីបទបរិហារកេរ្តិ៍ជាសាធារណៈ បរិហារបង្កាច់កេរ្តិ៍ និងធ្វើអត្ថាធិប្បាយដើម្បីដាក់សម្ពាធលើយុត្តាធិការ កាលពីថ្ងៃទី២៩ ខែឧសភា ឆ្នាំ២០១៥ មួយសប្ដាហ៍ក្រោយពីសកម្មជនការពារសិទ្ធិមនុស្សរូបនេះ បានប្រកាសដាក់ពាក្យបណ្ដឹងទៅស្ថាប័នអគ្គព្រះរាជអាជ្ញា តុលាការកំពូល និងក្រសួងយុត្តិធម៌ ប្រឆាំងនឹងមន្ត្រីតុលាការខេត្តសៀមរាបទាំងពីររូបនោះ៕
