ដើម្បីរួមចំណែកជាមួយរាជរដ្ឋាភិបាលកម្ពុជា ក្នុងការដោះស្រាយទំនាស់ ដីធ្លី សមាគមអាដហុក បានបង្កើតកម្ម វិធីថ្មីមួយ គឺការដោះស្រាយទំនាស់ក្រៅ ប្រព័ន្ធតុលាការ ។
ដោយមានការស្នើសុំពីគូភាគីទំនាស់ ដើម្បីឲ្យសមាគមអាដហុកប្រចាំខេត្តបន្ទាយមានជ័យ ធ្វើការសម្រុះសម្រួលករណីទំនាស់ដីធ្លីមួយ ដែលមានទីតាំង នៅភូមិរោងគោដើម ឃុំចំណោម ស្រុកមង្គលបូរី ខេត្តបន្ទាយមានជ័យ ។ នៅថ្ងៃទី២២ ខែកុម្ភៈ ឆ្នាំ២០១៣ វេលាម៉ោង៨និង៣០នាទីព្រឹក នៅក្នុងបរិវេណ វត្តរោងគោដើម លោកស៊ុំ ចាន់គា ជាអ្នកសំរបសំរួលសមាគមអាដហុកប្រចាំ ខេត្តបន្ទាយមានជ័យ និងជាអ្នកសម្រុះសម្រួល បានធ្វើការសម្រុះសម្រួល ក្រៅប្រព័ន្ធតុលាការករណី ទំនាស់ដីធ្លីដ៏រ៉ាំរ៉ៃមួយចាប់ពីឆ្នាំ២០០៦មកម្ល៉េះ សមាសភាពចូលរួមនៅក្នុងដំណើរការនីតិវិធីនេះ មាន លោក ធន សារាយ ប្រធានសមាគមអាដហុក អ្នកស្រី ឆន សុគន្ធា ប្រធានផ្នែក កញ្ញា ជូប៊ីន ម៉ុងស្ទ័រ មកពីសាកលវិទ្យាល័យធីលប័ក អាជ្ញាធរមូលដ្ឋាន (លោកមេឃុំចំណោម ស្មៀនឃុំ ប្រធានភូមិ អនុប្រធានភូមិ) ភាគីទំនាស់ទាំងសង្ខាងនិងមានសាក្សីផងដែរ ។
ទំនាស់នេះកើតឡើងរវាង អ្នកស្រី រិន រឿ និងអ្នកស្រី ប្រេស រី ចាប់តាំងពីឆ្នាំ២០០៦មកម្លេះ នៅលើដីទំហំ៥៥៥ម៉ែត្រការ៉េ ដោយមានការប្តឹងផ្តល់រហូត ដល់តុលាការទៀតផង ភាគីបានចំណាយ ថវិកាក្នុងការបង់ពន្ធលើពាក្យបណ្តឹង ថ្លៃចំណាយលើការធ្វើដំណើរពីមូលដ្ឋានទៅតុលាការ និង ចំណាយលើ សេវាផ្សេងៗទៀតអស់ថវិកាជាច្រើន ។
ក្រោយពីបានពិនិត្យឯកសារ និងក្រោយពីស្តាប់សេចក្តីថែ្លងការរបស់ភាគីពាក់ព័ន្ធ មន្រ្តី សមាគម អាដហុក បានប្រើពេលដើម្បីធ្វើការសម្រុះសម្រួល ដែលចំណាយពេល៣ម៉ោង ជាលទ្ធផល ឃើញថា ភាគីទាំងពីរបានឈានទៅដល់ការព្រមព្រៀងគ្នាដោយស្ម័គ្រចិត្ត មានន័យថាអ្នកស្រី រិន រឿ ដែលជា ដើមចោទបានឯកភាពដកពាក្យបណ្តឹងឈប់ប្តឹងអ្នកស្រី ប្រេស រី នៅសាលាដំបូងខេត្ត បន្ទាយមានជ័យ ក្នុងករណីទំនាស់ដីធ្លីទំហំ៥៥៥ម៉ែត្រការ៉េ។ ក្រោយពីបញ្ចប់កិច្ចសម្រុះសម្រួល លោក មេឃុំចំណោម បានថ្លែងអំណរគុណដល់សមាគម ដែលបានជួយធ្វើការសម្រុះសម្រួលករណីដីធ្លីដ៏រាំរ៉ៃនេះ និងរីករាយក្នុងការសហការការងារជាមួយសមាគមនៅពេលមានករណីផ្សេងៗទៀត ។
ពត៌ មានលំអិត ទំនាក់ទំនងជាមួយអ្នកស្រី ឆន សុគន្ធា
ប្រធានផ្នែកដោះស្រាយទំនាស់ក្រៅប្រព័ន្ធតុលាការ
