នៅថ្ងៃទី២៨ ខែកុម្ភៈ ឆ្នាំ២០១២ វេលាម៉ោង៩ និង៣០នាទីព្រឹក សមាគមអាដហុកបានពាំនាំយកអំណោយសម្បុរសធម៌ពីប្រទេសកាណាដា ទៅចែកជូនប្រជាពលរដ្ឋរងគ្រោះដោយទឹកជំនន់ និងជនក្រីក្របំផុតចំនួន៣៣៤គ្រួសារ ដែលរស់នៅក្នុងឃុំដងកាំបិត ស្រុកសណ្តាន់ ខេត្តកំពង់ធំ ដែលជាតំបន់ជាប់ព្រៃឡង់ ។ តំបន់ដែលសមាគមអាដហុក បានសម្រេចយកអំណោ
យទៅចែកជូននេះ គឺជាកន្លែងរងគ្រោះដោយទឹកជំនន់មួយក្នុងចំណោមកន្លែងទទួលរងគ្រោះធ្ងន់ធ្ងរនៅក្នុងខេត្តកំពង់ធំ ។ ការផ្តល់អំណោយជូននេះ គឺជាការផ្តល់បន្ថែមរបស់សមាគមអាដហុកទៅដល់ក្រុមប្រជាពលរដ្ឋមួយចំនួនធ្លាប់បានទទួល អំណោយលើកដំបូងពីរដ្ឋាភិបាលតែគាត់នៅមានស្ថានភាពធ្ងន់ធ្ងរក្រោយទឹកជំនន់ និងអ្នក ខ្លះមិនដែលទទួលបានសោះ ដោយសារការខ្វះចន្លោះនេះ សមាគមបានធ្វើការបំពេញបន្ថែមសម្រាប់ចែកជូនដល់ពួកគាត់ ។ សូមបញ្ជាក់ថា និតិវិធីក្នុងការស្រាវជ្រាវលក្ខខណ្ឌ នៃការបាន ទទួលអំណោយនេះ សមាគមបានចុះអង្កេតដល់មូលដ្ឋានដោយជួបប្រាស្រ័យផ្ទាល់ជាមួយ ប្រជាពលរដ្ឋ ដើម្បីចង្អុលបង្ហាញពីអ្នកក្រីក្រក្នុងមូលដ្ឋានរបស់គេក្នុងភូមិនីមួយៗ ។
អំណោយដែលសមាគម អាដហុកនាំយកទៅចែកជូនប្រជាពលរដ្ឋក្រីក្រចំនួន ៣៣៤គ្រួសារ មានអង្ករ៥០គីឡូក្រាម និងត្រីខមួយយួរ សម្រាប់មួយគ្រួសារ នៅក្នុងភូមិវាលស្រែខាងកើត១១៧, ភូមិវាលស្រែខាងលិច៥៤, ភូមិសំព័រតូច៣៤, ភូមិសំព័រធំ៧៦ និងភូមិស្រែខ្សាច់៥៣ ឃុំដងកាំបិត ស្រុកសណ្តាន់ ខេត្តកំពង់ធំ ទីកន្លែងដែលរៀបចំចែកជូនអំណោយ គឺនៅទីវត្តដ៏កំសត់មួយកន្លែង គឺរីបុព្វតារាម ហៅវត្តស្រែវាល ។
លោក ធន សារាយ ប្រធានសមាគមអាដហុកបានថ្លែងឲ្យដឹងថា អាដហុកបានចុះស្រាវជ្រាវផ្ទាល់រកក្រុមគ្រួសារដែលទទួលរងគ្រោះដោយទឹកជំនន់ និងក្រីក្របំផុត ហើយត្រូវបានជ្រើសរើសដោយមានការទទួលស្គាល់ពីអាជ្ញាធរ ភូមិ-ឃុំផងដែរ ដើម្បីផ្តល់ជំនួយទាំងអស់នេះលោកបានបន្តថា «វាជាអំណោយសប្បុរសជន ក្នុងន័យមនុស្សធម៌សុទ្ធសាធ គ្មានការរើសអើង និងមិនមានពាក់ព័ន្ធទៅនឹងគណបក្សនយោយ ឬក្រុមជនណានោះទេ»។
លោក ជុន ប៊ុនគន តំណាងសប្បុរសជនមកពីប្រទេសកាណាដាថា អំណោយដ៏តិចតួច នេះ គឺពិតជាជួយចូលរួមចំណែកដល់បងប្អូនក្រីក្រដែលជួប្រទះនូវការលំបាកបានមួយចំណែក ។ លោកនឹងនាំយករូបភាពវីដេអូអំពីសកម្មភាពនេះទៅបង្ហាញជូនម្ចាស់អំណោយនៅ ឯនាយសមុទ្រ ដែលបានផ្តល់ជូន និងសូមការគាំទ្របន្ថែមទៀត ។
លោក អ៊ុត សំអន អភិបាលរងខេត្តកំពង់ធំ ក៏ដូចអាជ្ញាធរមូលដ្ឋានដទៃដែល បានចូលរួមបានលើកឡើងថា ប្រជាពលរដ្ឋ៣៣៤គ្រួសារ មកពីភូមិចំនួន៥ នៅក្នុងឃុំ បានមកទទួលអំណោយក្រោយពីជួបគ្រោះទឹកជំនន់ធ្ងន់ធ្ងរនាឆ្នាំកន្លងទៅ ដែលបានរងការជន់ លិចទាំងស្រុង និងជាតំបន់នៅឆ្ងាយដាច់សង្វែងឆ្ងាយពីទីប្រជុំជននានា ។ តាំងតែពីអំឡុងជួបគ្រោះទឹកជំនន់នៅក្នុងឃុំដងកាំបិត មិនដែលមានអង្គការក្រៅរដ្ឋាភិបាល ឬក៏កាកបាទក្រហម ចុះមកដល់ដើម្បីចែកអំណោយផ្ទាល់នោះទេ ដោយសារតែមូលដ្ឋាននេះនៅឆ្ងាយដាច់ស្រយាលពិបាកធ្វើដំណើរ ខណៈដែលជំនួយសង្គ្រោះបន្ទាន់របស់អាជ្ញាធរខេត្ត បានទៅ ដល់ដៃគ្រួសារមួយចំនួនតូច ដែលបានហៅឡើងមកទទួលនៅឯសាលាស្រុកសណ្តាន់។ ទោះ ជាយ៉ាងណា លោកលើកឡើងថា អំណោយដែលសមាគមអាដហុកយកមកនេះ សំខាន់ណាស់ និងសមាគមមិនត្រឹមតែជួយការពារសិទិ្ធមនុស្សទេ ថែមទាំងជួយដោះស្រាយជីវភាព ពលរដ្ឋទៀតផង យើងមានទិសដៅរួមគ្នាដើម្បីជួយពលរដ្ឋ៕
