សមាគមអាដហុក មានការរន្ធត់ និងសោកស្តាយយ៉ាងខ្លាំងដោយសា
នៅថ្ងៃទី ២៨ ខែ វិច្ឆិកា ឆ្នាំ ២០១៣ ស្ត្រីខ្មែរម្នាក់ឈ្មោះ ថ.ប ធ.ត អាយុ ៣៣ឆ្នាំរស់នៅភូមិ ផាស៊ីស្រា ឃុំ ប្ញស្សីក្រោក ស្រុកមង្គលបូរី ខេត្តបន្ទាយមានជ័យ ត្រូវបានជនជាតិថៃវាយធ្វើទារុណកម្ម និងថតរូបអាក្រាតបង្ហោះជាសាធារណៈ ដោយសារតែថៅកែបនល្បែងជនជាតិថៃចោទប្រកាន់ថា ឃុបឃិតជាមួយអ្នកចូលលែងល្បែង បង្កលក្ខណៈអោយភ្ញៀវចូលលេងឈ្នះ ព្រោះស្ត្រីរងគ្រោះជាអ្នកចែកបៀរក្នុងបនល្បែង។
ស្ត្រីរងគ្រោះ ត្រូវបានថៅកែបនល្បែងជាជនជាតិថៃ ប្រើមេការក្នុងបនល្បែងចាប់វាយរហូតសន្លប់ចេញឈាមតាមរន្ធត្រចៀក ហើយប្រពន្ធថៅកែបនល្បែងបានយកកន្ត្រៃកាត់ សំរាតខោអាវជនរងគ្រោះចេញ រួចយកទូរសព្ទ័ថតរូបអាក្រាតនៅចំពោះមុខបុគ្គលិកដទៃទៀតទុកជាការព្រមានកុំអោយយកតម្រាប់តាម។
ស្ត្រីរងគ្រោះត្រូវបន្តឃុំខ្លួនដើម្បីសួរចម្លើយក្នុងបនល្បែងពីថ្ងៃទី ២៨ ខែ វិច្ឆិកា ឆ្នាំ ២០១៣ រហូតដល់ថ្ងៃទី ១៦ ខែ ធ្នូ ឆ្នាំ ២០១៣ ទើបដោះលែង ។
មុនចេញទៅប្រទេសថៃ ស្ត្រីរងគ្រោះធ្វើការក្នុងកាស៊ីណូ ហូលីដេ ក្រុងប៉ោយប៉ែត ខេត្តបន្ទាយមានជ័យ ប្រទេសកម្ពុជា ក្រោយពីបញ្ឈប់ការងារក្នុងកាស៊ីណូ ស្ត្រីរងគ្រោះបានចេញទៅប្រទេសថៃធ្វើការក្នុងបនល្បែងខាងលើបានរយះពេល ៨ខែទើបកើតមានអំពើទារុណកម្ម និងថតរូបអាក្រាតតែម្តង។
កិច្ចអន្តរាគមន៏ៈ
ថ្ងៃទី ១១ ខែ ធ្នូ ឆ្នាំ ២០១៣ ឈ្មោះ ថាប់ គីមលី ជាបងស្ត្រីរងគ្រោះ បានទទួលដំណឹងនូវអំពើទារុណកម្ម និងថតរូបអាក្រាតលើស្ត្រីរងគ្រោះ ពីឈ្មោះ ស្រីធំស្នាក់នៅប្រទេសថៃដែលផ្តល់ពត៌មានតាមទូរសព្ទ័ ក្រោយពីឃើញរូបភាពអាក្រាតរបស់ស្ត្រីរងគ្រោះត្រូវគេបង្ហោះជាសាធារណៈ។
ថ្ងៃទី ១៣ ខែ ធ្នូ ឆ្នាំ ២០១៣ ថាប់ គីមលី បងស្ត្រីរងគ្រោះ ជួបតំណាងស្ថានទូតកម្ពុជាប្រចាំប្រទេសថៃអោយជូយ តែត្រូវបានតំណាងស្ថានទូតកម្ពុជា ផ្តល់លេខទូរសព័្ទ NGOs នៅប្រទេសថៃ រួចប្រាប់បងជនរងគ្រោះអោយទៅរកគេជួយ ខាងស្ថានទូតពិបាកដោយសារពុំមានទីកន្លែងច្បាស់លាស់។
ថ្ងៃទី ១៥ ខែ ធ្នូ ឆ្នាំ ២០១៣ បងស្ត្រីរងគ្រោះ ជួប អគ្គរាជទូតកម្ពុជាប្រចាំ់ប្រទេសថៃ និងNGOs នៅថៃ ប្រាប់ពីទីកន្លែងរបស់ជនរងគ្រោះដែលគាត់បានស៊ើបដឹង តែត្រូវបានទូតកម្ពុជាប្រចាំប្រទេសថៃ និង NGOs ប្រាប់ថា គេចង់បានទីកន្លែងច្បាស់លាស់។
ថ្ងៃទី ១៦ ខែ ធ្នូ ឆ្នាំ ២០១៣ សមាគមអាដហុក បានទទួលបណ្តឹងពីឈ្មោះ ឆុំ សុភាព បងថ្លៃស្ត្រីរងគ្រោះ។
ថ្ងៃទី ១៦ ខែ ធ្នូ ឆ្នាំ ២០១៣ សមាគមអាដហុក បានជួបអន្តរាគមន៏ដោយៈ
- ជួបជាមួយស្នងការនគរបាលប៉ូលិសខេត្តបន្ទាយមានជ័យ។
- អន្តរាគមន៏ទៅ ប្រធានការិយាល័យព្រំដែនក្រុងប៉ោយប៉ែត។
- អន្តរាគមន៏ទៅអគ្គកុងស៊ុលខ្មែរប្រចាំប្រទេសថៃ។
- អន្តរាគមន៏ទៅ អគ្គរាជទូតកម្ពុជាប្រចាំប្រទេសថៃ។
ថ្ងៃទី ១៦ ខែ ធ្នូ ឆ្នាំ ២០១៣ វេលាម៉ោង ៤ល្ងាច តំណាងស្ថានទូតកម្ពុជា និង NGOs នៅប្រទេសថៃ បានជូនបងជនរងគ្រោះទៅដាក់ពាក្យបណ្តឹងនៅប៉ូលិសជួញដូរប្រទេសថៃ ក្រោយពេលមានកិច្ចអន្តរាគមន៏ និងផ្តល់ពត៌មានពីសមាគមអាដហុក។
ថ្ងៃទី ១៧ ខែ ធ្នូ ឆ្នាំ ២០១៣ តំណាងស្ថានទូតកម្ពុជាប្រចាំប្រទេសថៃ និងNGOs បានជួបជាមួយថៅកែបនល្បែង បន្ទាប់ពីថៅកែបនល្បែងទូរសព្ទ័មកបងស្ត្រីរងគ្រោះដើម្បីណាត់ជួប ។ ពេលជួបដោះស្រាយថៅកែបនល្បែងមិនព្រមដោះលែងស្ត្រីរងគ្រោះទេ ដោយចោទថាស្រ្តីរងគ្រោះឃុបឃិតធ្វើអោយបាត់លុយ១០លានបាត តែដោយមានការបង្ហាញរូបភាពធ្វើទារុណកម្មពីតំណាងស្ថានទូតកម្ពុជាប្រចាំប្រទេសថៃដល់ថៅកែបនល្បែង ទើបថៅកែបនល្បែងព្រមដោះលែងស្ត្រីរងគ្រោះនៅថ្ងៃដដែលនោះតែម្តង។
ថ្ងៃទី ១៩ ខែ ធ្នូ ឆ្នាំ ២០១៣ ស្ថានទូតកម្ពុជាប្រចាំប្រទេសថៃ និងNGOs បានជូនជនរងគ្រោះមកប្រទេសកម្ពុជាវិញ តាមច្រកប៉ោយប៉ែត។
បច្ចុប្បន្នស្ត្រីរងគ្រោះបានមកដល់ប្រទេសកម្ពុជា រស់នៅក្នុងស្ថានភាពភ័យខ្លាច តក់ស្លុតជាខ្លាំង ក្នុងពេលដែលជនប្រព្រឹត្តជាតិថៃកំពុងរស់នៅដោយមានសេរីភាពពេញលេញ មិនទាន់មានស្ថាបន័ ឬអាជ្ញាធរមានសមត្ថកិច្ចណាចាត់វិធានការផ្លូវច្បាប់លើពួកគេនៅឡើយ។
សន្និដ្ឋាន ស្រ្តីរងគ្រោះត្រូវទទួលរងការធ្វើទារុណកម្ម និងថតរូបអាក្រាតបង្ហោះជាសាធារណៈ ដែលនាំអោយមានការឈឺចាប់ និងប៉ះពាល់ដល់កិត្តិយសយ៉ាងខ្លាំង ដែលជនប្រព្រឹត្តត្រូវតែទទួលទោសតាមច្បាប់ មិនអាចអត់អោនបានឡើយ សមាគមអាដហុកបន្តជំរុញកិច្ចអន្តរាគមន៏ និងតាមដានចំណាត់ការតទៅទៀត។
