ក្រោមជំនួយឧបត្ថម្ភពីសហភាពអឺរ៉ុប (EU) និងអុកស្វាមណូវីប (Oxfam Novib) នៅក្នុងរយៈពេល ប្រាំមួយខែដើមឆ្នាំ២០១៣ នេះ ផ្នែកដោះស្រាយ ទំនាស់ក្រៅប្រពន្ធ័តុលាការនៃសមាគមអាដហុក បានប្រើប្រាស់នូវឧបករណ៏ទាំង២៣ ដែលជាជំនួយបច្ចេកទេសរបស់សាកលវិទ្យាល័យទីលប័ក មកធ្វើការដោះស្រាយទំនាស់តូចតាចជូនប្រជាពលរដ្ឋបានចំនួន៧៩ករណីរួមមានៈ
ដីធ្លី១៩ករណី កិច្ចសន្យា៦ករណី មត៌ក២ករណី អាពាហ៍ពិពាហ៍៧ករណី ទំនាស់ទ្រព្យសម្បត្តិ២ករណី ការដាំដើម ឈើក្បែររបង១ករណី ការប្រើប្រាស់ ផ្លូវសាធារណៈ៤ករណី ទំនាស់ពាក្យ សំដី៩ករណី ទំនាស់ក្មេងៗស្រឡាញ់គ្នា ១ករណី និង ផ្សេងៗ១ករណីក្នុងនោះមាន ៥៨ករណី ដោះស្រាយបានជោគជ័យ ដោយគូភាគីយល់ព្រមចុះកិច្ចព្រមព្រៀងបញ្ចប់ទំនាស់ ។
ដូច្នេះដើម្បីធ្វើការស្វែងយល់បន្ថែមទៀតអំពីឧបករណ៍នោះ ទើបនៅថ្ងៃទី ១៥ ដល់ថ្ងៃទី ១៧ ខែមិថុនា ឆ្នាំ២០១៣ លោក Robert Porter និងអ្នកស្រី Corry van Zeeland អ្នកជំនាញមក ពីសាកលវិទ្យាល័យធីលប័ក ប្រទេសហូឡង់ដ៍ បានធ្វើការចុះជួបសម្ភាសន៍អតីតភាគីទំនាស់ចំនួន១៥នាក់ នៅខេត្តព្រះសីហនុ ខេត្តកំពង់ស្ពឺ និងខេត្តកណ្តាល ដែលកន្លងមកធ្លាប់បានមករកសមាគមអាដហុកឲ្យជួយដោះស្រាយ ។ ក្នុងការជួបសម្ពាសន៍នោះ រួមមានភាគីទំនាស់ផ្សេងៗគ្នាដូចជា៖ ទំនាស់ក្នុងគ្រួសារ ទំនាស់ផ្លូវដើរ កិច្ចសន្យា(ជំពាក់ប្រាក់) ការបំផ្លិចបំផ្លាញទ្រព្យសម្បត្តិ(កាប់របង) និងទំនាស់គ្រូដាក់ទណ្ឌកម្មសិស្ស ។
ជាទូទៅ ព័ត៌មានសំខាន់ៗដែលយើងបានទទួលពីការធ្វើសម្ភាសន៍រួមមានៈ (១)ភាគីភាគច្រើនគេស្គាល់សមាគមអាដហុកតាមរយៈវគ្គផ្សព្វផ្សាយ (២)មូលហេតុធ្វើឲ្យពួកគេមករកសមាគមអាដហុក មកពីគេគិតថាសមាគមនេះ អព្យាក្រឹត មានយុត្តិធម៌មិនលំអៀង និង ជួយដោះស្រាយមិនយកលុយ (៣)ករណីជាទូទៅសុទ្ធសឹងត្រូវ បានឆ្លងកាត់ការដោះស្រាយរបស់អាជ្ញាធរភូមិឃុំ មុនមកដល់អាដហុក (៤)ពួកគេចូលរួមធ្វើការសម្រុះសម្រួលដោយស្មគ្រ័ចិត្ត (៥)នៅក្នុងដំណើរការសម្រុះសម្រួល ភាគី ទាំងពីរមានសិទ្ធិនិយាយស្មើៗគ្នាស្របតាមវិធានផ្ទៃក្នុង (៦)កិច្ចព្រមព្រៀងពិតជាកើតឡើងដោយឆន្ទៈ របស់ភាគី (៧)ការដោះស្រាយកន្លងមក ពួកគាត់ពុំដែលបានទទួលការលើកទឹកចិត្ត និងការពន្យល់ ច្បាស់លាស់ពីផលលំបាកនានា ដូចខាងសមាគមអាដហុកទេ និង (៨)នៅពេលដែលឭសំណួរថា បើថ្ងៃក្រោយមានបញ្ហា តើអាចដោះស្រាយបានដោយខ្លួនឯងទេ មានភាគីតិចតួចណាស់ ដែលឆ្លើយថាពួកគាត់នឹងព្យាយាមដោះស្រាយ ក្រៅពីនោះនៅតែសុំឲ្យអាដហុកជួយដដែល ។ ប៉ុន្តែទោះ ជាបែបនេះក្តី តាមរយៈនៃការធ្វើសម្ភាសន៍ដដែលនេះ យើងក៏ឃើញមានភាគីមួយចំនួនតួច បានសំដែងពីភាពមិនសូវពេញចិត្តចំពោះកិច្ចព្រមព្រៀង ដោយយល់ថា គេបាត់បង់ផលប្រយោជន៍ ។
បន្ទាប់មកនៅថ្ងៃទី ១៩ ដល់ថ្ងៃទី ២២ ខែ ឆ្នាំដដែល អ្នកជំនាញសកលវិទ្យាល័យធីលប័ក បានបន្តជួបជាមួយបុគ្កលិក អ្នកអនុវត្តការងារADR របស់សមាគមអាដហុក នៅទីស្នាក់ការកណ្តាល និង មកពីតាមខេត្តក្រុង សរុប២៣នាក់ ដើម្បីធ្វើការឆ្លុះបញ្ចាំងពីលទ្ធផលដែលបានរកឃើញ និង ធ្វើការពិភាក្សាអំពីភាពវិជ្ជមាន និង អវិជ្ជមាននៃឧបករណ៍ ព្រមទាំងរកវិធីសាស្រ្តសំរាប់ដោះស្រាយ។ លទ្ធផលជាទូទៅបានរកឃើញពីភាពវិជ្ជមានជាច្រើន ពិសេសឧបករណ៍ទាំង២៣មានការប្រទាក់ក្រឡាគ្នា អាចជួយជាមធ្យោបាយច្រើនដល់អ្នកសម្រុះសម្រួល ។ ចំពោះភាពអវិជ្ជមានវិញ ក៏បានត្រូវរកឃើញនៅក្នុងឧបករណ៍ខ្លះៗ រួចក៏បានរកវិធីសាស្រ្តដោះស្រាយហើយដែរ ។ ប៉ុន្តែមានបញ្ហាសំខាន់ៗបួន ដែលបានរកឃើញ និងគួរឲ្យចាប់អារម្មណ៍ ហើយពុំមានសរសេរក្នុងឧបករណ៍គឺៈ (១)ការសម្រុះសម្រួលមានការចូលរួមឲ្យយោបល់ពីអាជ្ញាធរ (២)ការសម្រុះសម្រួលមានភាគីពាក់ពន្ធ័ចូលរួមច្រើន (៣)ការសម្រុះសម្រួលមានការចូលរួមបំភ្លឺពីសាក្សី និង (៤)ការសម្រុះសម្រួលមានភាគីទំនាស់ច្រើន និង មានអ្នកសម្រុះសម្រួលច្រើន ។
នៅចុងបញ្ចប់នៃកិច្ចពិភាក្សា សមាជិកទាំងអស់បានឯកភាពគ្នា នឹងយកអ្វីដែលបានរកឃើញ ទៅធ្វើការកែលំអឧបករណ៍ទៅថ្ងៃមុខ ជាពិសេសបញ្ហាសំខាន់ៗបួន ដែលគ្មានក្នុងឧបករណ៍ ទាំង២៣នោះ ។
