ព្រះវិហាៈ នៅថ្ងៃទី១៥ ខែកុម្ភៈ ឆ្នាំ២០១៣ អ្នកស្រី ផុន សុភាព អាយុ៣៣ឆ្នាំ នៅក្នុងភូមិចុងដូង ឃុំចុងដូង ស្រុកបារាយណ៍ ខេត្តកំពង់ធំ បានដាក់ពាក្យបណ្តឹងចូល សមាគមសិទិ្ធមនុស្ស អាដហុក ខេត្តព្រះវិហារ ដើម្បីសុំកិច្ចអន្តរាគមន៍ពីអង្គការនេះសូមឲ្យជួយប្អូនប្រុស របស់អ្នកស្រី ឈ្មោះ អ៊ល សល់ អាយុ ១៧ឆ្នាំ ដែលត្រូវបានមន្រ្តីបរិស្ថានដែនជម្រកសត្វព្រៃបឹងពែរចាប់ខ្លួនវាយដំធ្វើទារុណ្ឌកម្ម កាលពីថ្ងទី១២ ខែកុម្ភៈ ឆ្នាំ២០១៣ កន្លងមក។
នៅថ្ងៃទី១០ ខែកុម្ភៈ ឆ្នាំ២០១៣ ឈ្មោះ អ៊
ល សល់ បានចេញដំណើរពីភូមិរបស់ខ្លួន ទៅស៊ីឈ្នួលបើកគោយន្តដឹកកាកសំណល់ឈើ (ជំរៀកឈើដែលនៅសេសសល់) ចេញពី ភូមិអូរពោ ឃុំរមណី ស្រុករវៀង ខេត្តព្រះវិហារ ទៅភូមិចុងដូង ឃុំចុងដូង ស្រុកបារាយណ៍ ខេត្តកំពង់ធំ យកទៅធ្វើគ្រឿងសង្ហារិម។ នៅវេលាម៉ោងប្រហែល ៧យប់ គោយន្ត របស់ អ៊ល សល់ បានបើកឆ្លងកាត់ដែនជម្រកសត្វព្រៃបឹងពែរ ស្ថិតនៅក្នុងស្រុករវៀង ជាមួយនឹងគោយន្ត២គ្រឿងផ្សេងទៀត។ ពេលនោះ មន្រ្តី បរិស្ថាន គ្រប់គ្រងជម្រកសត្វព្រៃ បានចាប់ឃាត់ខ្លួន យុវជន អ៊ល សល់ ហើយចំណែកឯ គោយន្ត២គ្រឿងទៀតមិនត្រូវបានមន្រ្តីបរិស្ថានដែនជម្រកសត្វព្រៃបឹងពែរចាប់នោះទេ។ ក្នុងពេល ឃាត់ខ្លួន នោះមានមន្រ្តីបរិស្ថាន ចំនួន ៨នាក់ បានចាប់ យុវជន អ៊ល សល់ ដាក់ខ្នោះដៃ និង និងយកទៅដាក់ច្រវាក់ជើងផ្អោបទៅនឹងសសរ ហើយ បង្អត់ បាយ ទឹក ពេញមួយយប់។
យោងតាម បងស្រីជនរងគ្រោះ អ្នកស្រី ផុន សុភាព បានចាត់ទុកទង្វើរបស់មន្ត្រីបរិស្ថានទាំងនេះថា ជាការធ្វើទារុណកម្មខុសច្បាប់។ ហើយពីមុនពួកមន្ត្រីទាំងនោះមិនដែលចាប់បែបនេះទេ គឺគេឲ្យបង់លុយពី៦ ទៅ ៨ម៉ឺនរៀល។ អ្នកស្រីផុន សុភាពបានឲ្យដឹងទៀតថា បន្ទាប់មកប្អូនប្រុសអ្នកស្រី ត្រូវបានគេបញ្ជូនទៅតុលាការខេត្តព្រះវិហារ នៅថ្ងៃទី១៣ ខែកុម្ភៈ។ តុលាការខេត្តបានសម្រេចដាក់ពន្ធនាគារប្អូនប្រុសរបស់អ្នកស្រី បណ្តោះអាសន្នពី បទរារាំងសមត្ថកិច្ច និងដឹកជញ្ជូនអនុផលព្រៃឈើខុសច្បាប់។
អ្នកស្រីអះអាងទៀតថា៖ «ប្អូនប្រុសខ្ញុំត្រូវគេដាក់នៅក្នុងបន្ទប់មួយជាមួយអ្នកទោសជាង២០នាក់ទៀត។ ពេលទៅដល់ក្នុងគុកភ្លាមប្អូនប្រុសខ្ញុំត្រូវអ្នកជាប់គុកដូចគ្នាវាយធ្វើបាប។ គេវាយហើយស្រែកថា អ្ហែងមកធ្វើអី។ ទីនេះពិបាកណាស់ ដឹងរឿងបែបនេះខ្ញុំបានយកលុយ៣លានរៀលទៅតម្កល់នៅតុលាការ សុំធានាប្អូនខ្ញុំចេញពីពន្ធនាគារ»។ ប្អូនប្រុសរបស់អ្នកស្រីត្រូវបានដោះលែងឲ្យនៅក្រៅឃុំ បណ្តោះអាសន្នកាលពីសប្តាហ៍មុន។ អ្នកស្រីបានស្នើឲ្យអាដហុកជួយអន្តរាគមន៍រកយុត្តិធម៌ និងសុំយកគោយន្ត និងឈើពីដែនជម្រកសត្វព្រៃបឹងពែរមកវិញ។
ក្រោយពីទទួលការសុំអន្តរាគមន៍ពីស្រី្តជាបងជនរងគ្រោះ លោក ឡោ ចាន់ អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ បានដាក់លិខិតមួយច្បាប់ទៅតុលាការខេត្ត នៅថ្ងៃចន្ទទី១៨ ខែកុម្ភៈ ឆ្នាំ២០១៣ ដើម្បីសុំឲ្យធ្វើការស៊ើបអង្កេតលើករណីនេះ។
លោកបានបញ្ជាក់ថា៖«ការចាប់ខ្លួនមនុស្សអាយុ១៧ឆ្នាំដាក់ខ្នោះដៃ និងច្រវាក់ជើងបែបនេះវាជាករណីរំលោភសិទ្ធិមនុស្សធ្ងន់ធ្ងរមួយ។
